Arsenal er komið í undanúrslit enska deildabikarsins eftir 6-3 sigur á Liverpool á útivelli í fjörugum leik í kvöld þar sem að Julio Baptista skoraði fernu en hann misnotaði einnig vítaspyrnu í leiknum.

Liverpool hafði harma að hefna eftir að hafa tapað 3-1 gegn Arsenal í enska bikarnum á laugardaginn en gestirnir fóru aftur með sigur af hólmi í kvöld.

Bæði lið gerðu níu breytingar á byrjunarliði sínu frá því í bikarleiknum en Liverpool þurfti síðan fljótlega að gera breytingu á liði sínu í kvöld eftir að Mark Gonzalez meiddist, af því er virtist illa.

Arsenal komst yfir á 27.mínútu í leiknum í kvöld. Jermaine Aliadiere tók þá glæsilega á mótri langri stungusendingu, hann átti skot sem Jerzy Dudek varði en Frakkinn ungi var á undan að ná frákastinu og hann náði að setja boltann í netið.

Átta mínútum síðar átti Fabio Aurelio skot úr aukaspyrnu á hinum enda vallarins, Manuel Almunia varði út í teiginn, Luis Garcia sendi fyrir og Robbie Fowler kom boltanum yfir línuna með því að taka boltann skemmtilega með hælnum og staðan orðin 1-1.

Julio Baptista skoraði síðan fyrsta mark sitt af fjórum í kvöld, þegar að hann setti boltann niður í hornið úr aukaspyrnu nokkuð fyrir utan teig en Dudek stóð frosinn í markinu og horfði á.

Vegna meiðsla Gonzalez í upphafi leiks var viðbótartíminn í fyrri hálfleik sex mínútur og það nýttu leikmenn Arsenal sér til hins ítrasta með því að skora tvívegis.

Alexandre Song skoraði fyrst eftir darraðadans í teignum eftir hornspyrnu og Baptista bætti við öðru marki skömmu síðar. Hann skoraði þá í autt markið eftir skemmtilegt samspil við Aliadiere.

Fjörið hélt áfram í síðari hálfleiknum. Arsenal fékk vítaspyrnu eftir að Sami Hyypia braut á Aliadiere á 56.mínútu en Dudek varði spyrnu Baptista. Baptista bætti fyrir það fjórum mínútum síðar þegar að hann skoraði með laglegu skoti fyrir utan teig.

Leikmenn Liverpool gáfust ekki upp og Steven Gerrard minnkaði muninn með fallegu skoti á lofti úr vítateigsboganum eftir að Gabriel Palletta hafði skallað boltann til hans. Gerrard átti síðan ekki löngu síðar aukaspyrnu sem að Almunia varði í slána.

Sami Hyypia gaf Liverpool veika von um að jafna leikinn þegar að hann minnkaði muninn í 5-3 með skallamarki þegar að tíu mínútur voru eftir af venjulegum leiktíma.

Baptista innsiglaði hins vegar sigur Arsenal með því að skora fjórða mark sitt á 85.mínútu en hann setti boltann auðveldlega í netið eftir að Aliadiere hafði komist upp að endamörkum og sent fyrir.

Lokatölur 6-3 fyrir Arsenal sem er komið eins og fyrr segir í undanúrslit deildabikarsins þar sem að liðið mætir erkifjendunum í Tottenham. Arsenal hefur nú slegið Liverpool út úr bæði enska bikarnum og deildabikarnum með nokkurra daga millibili og í leikjunum tveimur skoruðu þeir alls níu mörk og alls hafa þeir skorað tólf mörk í þremur leikjum liðanna á leiktíðinni.

Liverpool: Jerzy Dudek, Fabio Aurelio, Danny Guthrie, Sami Hyypia, Gabriel Paletta, Steven Gerrard, Mark Gonzalez(Garcia 11(Carragher 75)), Stephen Warnock(Alonso 58), Craig Bellamy, Robbie Fowler, Lee Peltier.
Ónotaðir varamenn: Jose Reina, Peter Crouch.

Arsenal: Manuel Almunia, Johan Djourou, Justin Hoyte, Kolo Toure, Armand Traore(Connolly 88), Julio Baptista, Neves Denilson, Cesc Fabregas, Alexandre Song, Jeremie Aliadiere, Theo Walcott(Diaby 74).
Ónotaðir varamenn: Henri Lansbury, Mart Poom, Mark Randall.