Fótbolti.net

fös 11. maí 2007 08:04

Hafliði Breiðfjörð

Spá Fótbolta.net í Landsbankadeild: 1. sæti

Sérfræðingar Fótbolta.net spá því að FH verði Íslandsmeistarar í Landsbankadeild karla 2007, fjórða árið í röð. Tólf sérfræðingar spá í deildina fyrir okkur þetta árið en þeir raða liðunum upp í röð og það lið sem er í efsta sæti fær tíu stig, annað sæti níu og svo koll af kolli niður í tíunda sæti sem gefur eitt stig. FH fékk 125 stig út úr þessu.

Sérfræðingarnir sem spáðu eru:
Atli Eðvaldsson, Ásmundur Arnarsson, Bjarni Jóhannsson, Gunnar Oddsson, Henry Birgir Gunnarsson, Hrafnkell Kristjánsson, Hörður Magnússon, Jörundur Áki Sveinsson, Logi Ólafsson, Luka Kostic, Pétur Pétursson, Víðir Sigurðsson, Þorlákur Árnason.

Hvað segir Ásmundur?
Ásmundur Arnarsson er sérstakur álitsgjafi okkar um Landsbankadeild karla. Ásmundur sem er þjálfari Fjölnis sem leikur í 1. deildinni hefur séð mikið af leikjum á undirbúningstímabilinu og lið hans hefur mætt mörgum af liðunum í deildinni.

Hér að neðan má sjá álit Ásmundar á FH.

Um FH:
Enn eitt árið virðist FH mæta með sterkasta hópinn til leiks. Allt í tengslum við liðið og félagið er til fyrirmyndar. Frábær umgjörð, frábærir stuðningsmenn, flott þjálfarateymi og frábær hópur. Þeir hafa unnið báða titlana sem í boði hafa verið í ár og það er alveg ljóst að það verður erfitt að stoppa þessa maskínu. Fátt bendir til annars en að þeir sigri deildina í ár og nú ætla þeir sér væntanlega Bikarinn einnig.

Það er sterkt fá varnarjaxlana Auðunn Helga og Sverri Garðars inn eftir meiðsli og þó koma tvíburana til félagsins hafi verið umdeild þá hafa þeir verið að klára leikina fyrir þá að undanförnu.

Með Arnar og Bjarka í formi og Matthías Guðmundsson og Tryggva Guðmundsson sitthvoru megin við þá eru þeir íllviðráðanlegir. Sigurvin Ólafsson hefur einnig skorað grimmt á undirbúningstímabilinu sem og Matthías Vilhjálmsson sem er virkilega skemmtilegur leikmaður. Þá er Atli Guðnason ótrúleg markamaskína en hann má helst ekki stíga inn á völlinn þá er hann búinn að skora.

Satt best að segja er ekki auðvelt að sjá hvaða lið getur stöðvað FH liðið í ár og ætli sé ekki rétt að setja smá pressu á þá og spá þeim “Fernu” í ár fyrst þeir hafa nú þegar tekið tvo titla.

Styrkleikar:
Gríðarlega sterkur og breiður hópur og þá sérstaklega í framlínunni. FH hefur skapað sér mikla hefð undanfarin ár og hefur frábæra umgjörð og stuðningsmenn. Leikmenn liðsins hafa óbilandi sjálfstraust og það er dýrmætt í baráttunni.

Veikleikar
Það er erfitt að finna veikleika í svo sterku liði sem FH liðið er. Ef maður á að nefna eitthvað þá virðist ennþá vanta leikmann sem getur tekið við af gamla brýninu Heimi Guðjónssyni sem afgerandi leiðtogi liðsins. Davíð Þór Viðarssyni er væntanlega ætlað þetta hlutverk og það verður fróðlegt að fylgjast með því hvernig það gengur.

Gaman að fylgjast með
Það eru auðvitað margir leikmenn hér sem gaman er að fylgjast með en Matthías Vilhjálmsson er spennandi leikmaður og hefur verið mjög vaxandi í vetur og eins er Atli Guðnason að styrkjast mikið. Það verður gaman að sjá hvort þeir komist að í sterku liði FH.

Lykilmaður
Það er erfitt að benda á ákveðinn lykilmann í þessu liði. Tommy Nielsen hefur verið lykilmaður og stjórnandi í varnarleiknum en sóknarlega hefur Tryggvi Guðmundsson verið traustur og ef tvíburarnir verða í standi í sumar verða þeir lykilmenn í sóknarleik liðsins.

Þjálfarinn:

Smiðurinn Ólafur Jóhannesson þjálfar FH fimmta árið í röð. Ólafur lék með FH í mörg ár og hefur áður þjálfað FH árin 1988-1991 og svo aftur árið 1995 þegar hann hætti á miðju tímabili.

Ólafur hefur náð bestum árangri allra þjálfara með liðið. Fyrst er FH var nokkrum mínútum frá því að verða Íslandsmeistari 1989 en endaði í 2. sæti á eftir KA og svo hefur hann náð frábærum árangri með FH nú eftir að hann tók við liðinu í þriðja sinn árið 2003.

Á fyrsta ári urðu þeir í öðru sæti deildarinnar, og næstu þrjú árin urðu FH-ingar Íslandsmeistarar og er spáð titlinum fjórða árið í röð. Ólafur hefur þjálfað fleiri lið hér á landi en hann kom Skallagrími í efstu deild fyrir nokkrum árum.

Líklegt byrjunarlið FH í upphafi móts:

Völlurinn:
FH leikur heimaleiki sína á Kaplakrikavelli í Hafnarfirði. Völlurinn tekur 6738 áhorfendur en sæti eru í stúku og gegnt henni var svo komið fyrir miklum fjölda af sætum síðasta sumar svo heildarsætafjöldi er kominn í 2250. Auk þess er góð aðstaða fyrir áhorfendur fyrir aftan bæði mörkin og í stæðum og í heildina er Kaplakrikavöllur skráður til að geta tekið við 6738 áhorfendum. Grasið var tekið upp fyrir þremur árum.
.

Stuðningsmenn:
Meðal þekktra stuðningsmanna FH eru Logi Ólafsson landsliðsþjálfari, Halli og Heiðar úr Botnleðju, Magnús Ólafsson leikari, Jakob Bjarnar Grétarsson blaðamaður og útvarpsmaður, Árni Mathisen fjármálaráðherra, Hörður Magnússon sjónvarpsmaður, Guðmundur Árni Stefánsson sendiherra, Björgvin Halldórsson söngvari, Þorgerður Katrín Gunnarsdóttir menntamálaráðherra, Sigurður Sigurjónsson leikari .

Spáin
nr.	Lið	Stig
1	FH	125
2	KR	114
3	Valur	111
4	Keflavík	79
5	Breiðablik	73
6	Fylkir	62
7	Fram	51
8	ÍA	45
9	Víkingur	36
10	HK	19

Um félagið

Fimleikafélag Hafnarfjarðar
Stofnað 1929, knattspyrnudeild stofnuð 1939.

Titlar:
Deildarmeistarar 2002 og 2004
Íslandsmeistarar 2004, 2005, 2006

Búningar:
Adidas

Aðalbúningur:
Hvít treyja, svartar buxur, hvítir sokkar

Varabúningur:
Blá treyja, bláar buxur, bláir sokkar

Opinber vefsíða:
FH.is

Stuðningsmannasíða:
FHingar.net

Komnir og farnir

Nýjir frá síðasta sumri:

Arnar Gunnlaugsson frá ÍA
Bjarki Gunnlaugsson frá ÍA
Matthías Guðmundsson frá Val
Auðun Helgason, snýr aftur eftir meiðsli
Sverrir Garðarsson, snýr aftur eftir meiðsli

Farnir frá síðasta sumri:

André Schei Lindbæk, í dönsku 1. deildina
Peter Matzen, til Fremad Aarhus
Baldur Bett, í Val
Ármann Smári Björnsson í Brann
Árni Freyr Guðnason til Fremad Aarhus á láni
Haukur Ólafsson í Þrótt á láni
Tómas Leifsson í Fjölni
Hermann Albertsson í Víking