Prince Rajcomar fer ekki til Vals.
Breiðablik hefur hafnað ósk Íslandsmeistara Vals um að fá framherjann Prince Rajcomar á láni út tímabilið. Þetta staðfesti Ólafur Björnsson hjá meistaraflokksráði karla í Breiðabliki í samtali við Fótbolta.net í gærkvöld.
Prince Rajcomar er 23 ára gamall hollenskur framherji sem kom til Breiðablik fyrir síðustu leiktíð.
Hann lék 16 leiki með Breiðablik í Landsbankadeildinni á síðustu leiktíð og skoraði í þeim sex mörk auk þess sem hann skoraði þrjú mörk í þremur bikarleikjum.
Hann hefur skorað fimm mörk í 10 leikjum liðsins á þessari leiktíð auk þess sem hann skoraði eitt mark í einum leik í VISA-bikarnum.
Valsmenn hafa misst Birki Má Sævarsson frá félaginu nú í mánuðinum en hann er farinn í atvinnumennsku hjá Brann í Noregi.
Þá er Pálmi Rafn Pálmason á leiðinni til Stabæk í Noregi en Valur hefur samþykkt tilboð í hann.
Valsmenn hafa fengið til sín danska framherjann Henrik Eggerts frá Fram en lánuðu Daníel Hjaltason til Víkings um helgina.
Athugasemdir
