Arnar Grétarsson í fyrri leik liðanna á leiktíðinni á Akranesi
Arnar Grétarsson fyrirliði Blika var skiljanlega himinlifandi eftir frækilegan stórsigur á Skagamönnum í kvöld 6-1 á Kópavogsvelli í kvöld. Eftir góðan sigur á erkifjendunum í HK í síðasta leik tókst Blikum að fylgja þeim leik vel á eftir með stórkostlegri frammistöðu gegn lánlausum Skagamönnum sem voru einfaldlega yfirspilaðir á löngu köflum í leiknum.
,,Já, já við spiluðum vel á móti HK og höfðum auðvitað átt að vinna mun sannfærandi sigur þar. En við vorum klárlega tilbúnir í dag, nýttum færin okkar vel og spiluðum bara alveg gríðarlega vel. Nenad, Marel og Jói voru náttúrulega að gera frábæra hluti og auðvitað allt liðið en þessir þrír voru að blómstra. Þegar við erum í þessum gír þá erum við til alls líklegir," sagði Arnar Grétarsson.
Aðspurður hvort þetta hafi ekki verið einn stærsti sigur í sögu karlaliðs Blika í efstu deild, taldi Arnar svo vera:
,,Já, mér skilst að þetta sé einn af stærstu sigrum okkar í efstu deild, það er bara glæsilegt og bara gleðiefni," sagði Arnar afar sáttur með þann áfanga.
Blikar hafa verið duglegir að setja áskoranir á þjálfarann sinn og Ólafur Kristjánsson var með eina slíka á bakinu fyrir leik.
,,Já, hann var með áskorun, nú þarf hann og aðstoðarþjálfarinn að hjóla til Bláa lónsins, þannig að það verður gaman að því, við förum á bíl," sagði hlægjandi Arnar Grétarsson fyrirliði Blika í leikslok.
Athugasemdir
