Ólafur Kristjánsson þjálfari Breiðabliks á hliðarlínunni í kvöld.
Ólafur Kristjánsson var í sjöunda himni eftir leik sinna manna í kvöld enda ekki annað hægt eftir magnaðan stórsigur liðsins á Skagamönnum.
,,Jú, við viljum alltaf bæta okkur. Strákarnir eru búnir að vera rosalega einbeittir, bæði þeir sem hafa verið að spila og eins þeir sem ekki hafa fengið að spila. Og þetta er kannski afraksturinn af því að hópurinn er samstilltur og vill virkilega vinna fyrir hlutunum og eru hlýðnir," sagði Ólafur í léttum tón við okkur hjá Fótbolta.net í leikslok.
Blikar óðu bókstaflega í færum gegn HK í síðasta leik en tókst illa að nýta öll þau tækifæri en þeim gekk mun betur upp við mark Skagamanna í kvöld.
,,Já, við sköpuðum alveg helling af færum gegn HK og markmiðin voru alveg skýr að halda því áfram og setja svo boltann í markið og það tókst svo sannarlega í þessum leik. Það voru gríðarlega margar sóknaruppbyggingar í gangi og við nýtum flest færin í fyrri hálfleik og svo finnst mér allir leikmenn í rauninni leysa stöðurnar sínar frábærlega í seinni hálfleik," sagði Ólafur Kristjánsson.
Aðspurður hvort Blikar stefndu ekki bara á toppbaráttuna eftir svona stórkostlega frammistöðu og þrjá sigurleiki í röð kvaðst Ólafur vera með báða fæturna á jörðinni.
,,Við erum alveg rólegir og þetta er hverfult og markmiðin hjá okkur voru alveg skýr fyrir mótið og við ræddum þau aftur eftir 11 leiki þannig að við vinnum bara í þeim og sjáum hvað setur," sagði Ólafur sæll og glaður eftir sigur sinna manna.
Athugasemdir
