Magnús Már Einarsson skrifar frá Rotterdam í Hollandi
Búast má við að þónokkuð af Íslendingum verði á leiknum gegn Hollendingum í Rotterdam klukkan 18:45 í kvöld.
Fótbolti.net hitti nokkra stuðningsmenn Íslendinga í dag og þeir eru margir hverjir bjartsýnir og búast við dramatískum sigri á meðan að aðrir búast við tapi.
Fyrr í dag hitti Fótbolti.net hollenska stuðningsmenn að máli og þeir eru á því að þeirra menn eigi eftir að sigra örugglega í kvöld. Við skulum hins vegar kíkja á það hvað íslensku stuðningsmennirnir sögðu.
Stefán Þór Sigurbjörnsson: Leikurinn fer 1-0 fyrir Íslandi og við skorum í uppbótartíma eftir fyrirgjöf. Ég held að Hemmi (Hermann Hreiðarsson) skori með skalla.
Viðar Örn Viðarsson: Ég held að þetta fari 3-0 fyrir Hollandi. Þeir eru of stór munnbiti held ég fyrir íslenska landsliðið. Það verður 3-0 í hálfleik og þetta endar þannig.
Atli Már: Við tökum þetta 2-1. Við lendum undir, Hollendingar skora á fyrstu tuttugu mínútunum en síðan skorum við tvö mörk á síðustu fimm mínútunum. Hemmi skorar með skalla og síðan kemur Eiður og skorar sigurmarkið.
Rúnar Gissuararson: Þetta fer 4-1 fyrir Hollendinga. Þeir liggja í sókn allan tímann og Eiður Smári setur eitt þegar að þeir eru komnir fram.
Guðmundur Fannar Sigurbjörnsson: Leikurinn fer 1-0 fyrir Ísland og Heiðar Helguson skorar sigurmarkið á 89.mínútu.
