,,Þetta var flott byrjun á mótinu," sagði Steinþór Þorsteinsson leikmaður Stjörnunnar sem var leikmaður 1. umferðar í Pepsi deild karla á Fótbolta.net.

Auðun Helgason fékk rauða spjaldið strax á annarri mínútu er hann braut á Steinþór og úr spyrnunni skoraði Halldór Orri Björnsson.

,,Þetta skemmdi leikinn fyrir þá en gerði ekkert nema gott fyrir okkur. Þeir voru svolítið bitlausir eftir þetta."

,,Leikurinn var mjög rólegur eftir þetta, við vorum með boltann í vörninni og Ondo einn að berjast þarna frammi. Þeir ætluðu greinilega að beita skyndisóknum og pakka bara í vörn."

,,Við erum með fljóta menn allstaðar á vellinum og líka útaf því að þeir voru einum færri. Leikmenn hjá þeim voru orðnir þreyttir á því að elta boltann bara."

Leikmenn Stjörnunnar byrjuðu einnig vel í fyrra og vonast Steinþór eftir því að liðið geti haldið út lengur í ár.

,,Við vonum að við fylgjum þessu lengur eftir en síðast. Ég tel að við séum með miklu sterkari hóp en í fyrra."

Stjarnan bætti við sig nokkrum sterkum leikmönnum í vetur og virkar töluvert sterkara á pappírunum en í fyrra.

,,Menn sem voru í byrjunarliðinu í fyrra voru ekki í hóp í gær eða á bekknum. Þetta sýnir það að við séum búnir að bæta við okkar hóp."

,,Það er gott að fá Marel hann dregur mikið til sín og þá er mjög gott að fá Dóra (Halldór Orri Björnsson). Svo erum við með fullt af mönnum á bekknum sem geta komið inn líka."

Stemmningin á gervigrasinu í Garðabæ var einnig mjög góð.

,,Það var flott stemning og gaman að sjá hvað þeir voru flottir. Það er alltaf gaman að heyra hróp og köll og þeir hafa ekki neinu gleymt frá því fyrra."

,,Við verðum að fá einhver stig á útivelli, það þýðir ekki bara að vinna heimaleikina."

Steinþór hefur verið i landsliðinu undanfarið og staðið sig vel, hann vonast eftir því að halda sæti sínu.

,,Ég ætla að vona að maður þurfi ekki að vera í atvinnumennsku til að komast í landsliðið en það er bara undir Óla Jó (Ólafi Jóhannessyni, landsliðsþjálfara) komið," sagði Steinþór sem sem vonast eftir sæti í hópnum gegn Andora í lok maí.

,,Klárlega, maður vonast alltaf til þess en eins og ég segi þá verður maður bara að spila sinn leik og vona að það sé nóg," sagði Steinþór að lokum í samtali við Fótbolta.net.