Það var hið þokkalegasta veður í Mosfellsbæ þegar heimamenn í Aftureldingu tóku á móti Völsungi að Varmárvelli. Völlurinn þótti mjög blautur og mátti oft á tíðum sjá leikmenn beggja liða renna á vellinum. Heyra mátti í hinum vinsælu Vuvuzela lúðrum sem eru að slá í gegn á HM í Afríku.

Fyrsta færi leiksins kom strax á 40.sekúndu þegar boltanum var spyrnt inná vítateig Aftureldingar og þar var framherjinn knái Elfar Árni Aðalsteinsson sem kom sér í ákjósanlegt færi en markvörður heimamanna Skarphéðinn Magnússon sá við honum.

Lítið annað markvert gerðist næstu mínúturnar fyrir utan nokkur hálffæri á báða boga.
Það var hinsvegar eftir rúman fyrsta fjórðung leiksins sem Völsungur átti aukaspyrnu utan af velli, henni var spyrnt inná teig heimamanna og þar áttu gestirnir skalla á markið úr dauðafæri en Skarphéðinn var vel á verði í markinu.

Fyrsta mark leiksins leit dagsins ljós skömmu síðar og þar voru gestirnir að verki. Andri Valur Ívarsson fékk boltann fyrir utan teiginn og lék á tvo leikmenn Aftureldingar áður en hann átti skot utan teigs sem hafði viðkomu í varnarmanni og þaðan í netið. Dapur varnarleikur heimamanna sem söknuðu greinilega John Andrews sem tók út leikbann í þessum leik.

Völsungur var sterkari aðilinn fyrsta hálftímann og áttu heimamenn nokkuð erfitt með að koma sér í almennileg marktækifæri. Skot utan vítateigs sem flest voru bitlaus einkenndu þeirra leik þar til þeir áttu sitt fyrsta hættulega færi fimm mínútum fyrir hálfleik, þegar Fannar Baldvinsson átti fyrirgjöf fyrir mark gestanna og Arnór Þrastarson náði að pota tánni í boltann en Steinþór Auðunsson markvörður gestanna varði vel.

Seinni hálfleikur fór heldur fjörugri af stað en sá fyrri en Arnór Þrastarson fyrirliði heimamanna fékk að líta gula spjaldið fyrir leikaraskap inní vítateig Völsungs strax á upphafsmínútunum. Harður dómur en blautur völlurinn varð til þess að lítil snerting varnarmanns gestanna setti Arnór úr jafnvægi og þar með féll hann.

Stuttu seinna átti Jón Hafsteinn Jóhannsson, miðjumaður Völsungs, hörkuskot í slá úr aukaspyrnu af 35 metra færi. Boltinn var allan tímann á uppleið og small í þverslánni en spurning hvort markvörður heimamanna hefði ekki getað blakað boltanum yfir markið.

Völsungur hélt áfram að vera sterkari aðilinn í leiknum og sköpuðu sér fínt færi eftir 20.mínútna leik þegar Elfar Árni Aðalsteinsson fékk góða sendingu inn fyrir en stórbrotinn varnarleikur Sindra Más Kolbeinssonar varð til þess að Skarphéðinn í marki heimamanna komst í boltann.

Eftir um hálftíma leik í seinni hálfleik héldu áhorfendur að nú væri komið að jöfnunarmarkinu en Arnór Þrastarson átti þá bylmingsskot í stöngina og aftur fyrir markið.

Undir lok leiksins átti Skarphéðinn Magnússon hrikalega hreinsun frá marki sínu en Völsungur náði ekki að gera sér mat úr því, hinsvegar komst Afturelding í sókn og uppúr henni uppskáru þeir aukaspyrnu við vítateigshornið. Gísli Freyr Brynjarsson sem hafði komið inná sem varamaður tók spyrnuna og smellti boltanum föstum niðri í fjær hornið án þess að markvörður gestanna kom nokkrum vörnum við.

Jöfnunarmarkið því staðreynd og lauk leiknum því með 1-1 jafntefli. Fyrsta jafntefli Aftureldingar í deildinni í ár en það fjórða hjá Húsvíkingum.