Rúrik á æfingu íslenska liðsins í fyrrakvöld.
Ólafur Jóhannesson þjálfari íslenska landsliðsins segir að Rúrik Gíslason framherji liðsins hafi misst af æfingu liðsins í gær vegna veikinda og þá sé ljóst að Brynjar Björn Gunnarssson missi af leiknum gegn Noregi á morgun vegna meiðsla.
,,Rúrik Gíslason hefur verið lasinn. Hann var veikur úti í Danmörku og kom hingað heim ekki alveg heill. Það var smá hiti í honum og hann æfði ekki með okkur ígær en ætlar að æfa núna. Hann hefur verið í smá veikindum," sagði Ólafur á fréttamannafundi íslenska landsliðsins nú undir kvöld. Eins og kom fram hér á Fótbolta.net fyrr í kvöld hefur Grétar Rafn Steinsson ekki beitt sér að fullu en verður með í leiknum á morgun en Brynjar Björn verður ekki með.
,,Brynjar Björn er off, hann verður ekki með í þessum leik. Hann er meiddur og mjög tæpt að hann verði með í Danmörku. Að öðru leitir er hópurinn fínn og allir 100% heilir." sagði Ólafur ennfremur en mun hann kalla einhvern inn í hópinn.
,,Ég er ekki alveg ákveðinn í því en ég mun taka stöðuna á föstudagskvöldið eftir þennan leik hérna, hvernig ástandið á mönnum verður. Ef það veður svo að það verða 1-2-3 í burtu þá mun ég sækja mér leikmenn en ef það verður aðeins einn þá er ég ekkert viss um að ég sæki mann. Ég mun vega það og meta."
