Brynjar Ingi Erluson @brynjarerluson

Textalýsing Skýrslan

Hvað réði úrslitum? Magnaður baráttuandi Blika. Það hefur sjálfsagt tekið á að tapa þremur deildarleikjum í röð og fyrir Fylki í bikarnum en liðið steig upp í dag, var skapandi i sóknarleiknum og heildina litið var varnarleikurinn allt í lagi. Föstu leikatriðin voru að ganga upp hjá báðum liðum sóknarlega en varnarlega voru liðin hins vegar í basli. Blikar voru mun betri í fyrri hálfleik, miðjan var þeirra og liðið komst yfir. Milos Ozegovic kom inn á miðjuna hjá Víkingum í hálfleik og skipti sköpum til að byrja með. Blikar misstu miðjuna sína og jöfnunarmarkið kom. Það sló liðið samt ekki útaf laginu og tvö mörk eftir hornspyrnu reyndist nóg til þess að landa sigri. Bestu leikmenn 1. Gísli Eyjólfsson (Breiðablik) Hann var skapandi í holunni og mér sýndist hann svei mér þá vera svarið fyrir sóknarleik Blika. Það hefur verið vesen á síðasta þriðjungnum en hann fann lausn á því. Frábær í dag. 2. Davíð Kristján Ólafsson (Breiðablik) Davíð Kristján átti mark og stoðsendingu í dag. Hann skoraði eftir laglega sendingu frá Arnþóri Ara og átti svo hornspyrnuna sem Efete skoraði úr. Hefur verið flottur í byrjun móts þrátt fyrir töpin en þarna var hann extra-góður. Atvikið Atvikið gerðist ekki í sjálfum leiknum enda litið af einhverjum sérstökum atvikum. Það var fjölmennt í Víkinni en Milos Milojevic var mættur að spjalla við stjórnarmenn Víkings aðeins tveimur dögum eftir að hann hætti með liðið. Arnar Grétarsson var einnig á leiknum og þá var Logi Ólafsson á vellinum. Hann hefur verið orðaður við Breiðablik.

Hvað þýða úrslitin? Blikar ná í fyrsta sigurinn og kærkomið var það. Gísli Eyjólfsson var lykillinn að frábærum sóknarleik Blika, hann var settur í holuna og Arnþór fyrir aftan hann. Tokic skoraði fyrsta markið sitt og þvi eflaust mikill léttir fyrir hann og Blikar geta andað eðlilega. Efete og Damir eru að styrkja sitt samband í miðverðinum og Davíð var magnaður í vinstri bakverðinum. Martin Lund og Höskuldur voru líflegir einnig. Þetta eru auðvitað vond úrslit fyrir Víkinga en ef liðið lagar varnarleik sinn í föstum leikatriðum þá ætti liðið ekki að hafa miklar áhyggjur. Liðið skapaði sér fullt af færum en nýtingin var slök. Bæði þeirra mörk komu eftir hornspyrnu frá Ívari Erni Jónssyni. Milos Ozegovic var klárlega svarið á miðjuna hjá liðinu, lokaði á spil Blika. Á heildina litið geta Blikar verið sáttir en Víkingar þurfa alls ekki að skammast sín fyrir sína spilamennsku heldur. Vondur dagur Ivica Jovanovic, sem byrjaði frammi hjá Víkingum, var ekkert sérstakur. Skapaði sér fullt af færum en nýtti þau herfilega. Laflaus skot og á að gera betur en hann gerði. Muhammed Mert var líka afar slakur enda breyttist spilamennska Víkinga á miðjunni eftir að Ozegovic kom inn fyrir Mert. Dómarinn - 6 Hann þvældist lítið fyrir mönnum. Dæmdi bara afbragðsvel í sólinni.