Markalaust í fremur bragðdaufum fyrri hálfleik. KR-ingar komust yfir í leiknum en á mjög sérstakan hátt fjaraði skyndilega undan liðinu. FH fann taktinn og þar hafði innkoma Bjarna Þórs Viðarssonar og Atla Viðars Björnssonar mikið að segja. Gríðarlega mikilvægar vörslur hjá Róberti Erni Óskarssyni á lykilmómentum og línubjörgun hjá Bödda löpp sáu einnig til þess að FH fór heim með stigin þrjú.

Böddi löpp bjargaði á línu á 82. mínútu og kom í veg fyrir að KR kæmist í 2-1. Nokkrum mínútum síðar skorar Atli Guðnason og kemur FH í forystu.

FH-ingum er spáð Íslandsmeistaratitlinum og þessi sigur er RISASTÓR enda á útivelli gegn liðinu sem spáð er öðru sæti. Skýr skilaboð gefin.

Ekki óskabyrjun fyrir Bjarna Guðjónsson þjálfara. Bjarna gekk ekki vel hjá Fram í fyrra og þetta var hans fyrsti leikur við stjórnvölinn hjá KR og þar er tap fyrir erkifjendunum. KR-ingar virtust vera með þetta í hendi sér en skyndilega fjaraði undan.

Erfiður leikur að dæma enda mikið um baráttu og návígi. Rauði baróninn er okkar reyndasti dómari og hafði góð tök.