Jafnræði var með liðunum í fyrri hálfleik en Skagamenn áttu mun hættulegri færi í þeim seinni. Þeir fundu mun betri takt í sóknarleiknum og áttu mörg góð færi. Víkingar voru óheppnir að skora ekki undir lok leiksins með skyndisóknum.

Markið sem Igor Taskovic skorar í uppbótartíma en er dæmt af vegna brots á markverði ÍA. Víkingar voru alls ekki sáttir með dómara leiksins þá.

Fyrir heimamenn eru þetta tvö glötuð stig eftir að hafa verið betri aðilinn stóran hluta seinni hálfleiks en á móti gæti stigið reynst dýrmætt í fallbaráttunni þegar upp er staðið. Fyrir Víkinga eru þetta vond úrslit enda ætla þeir sér að vera í toppbaráttunni í sumar og þá mega þeir ekki misstíga sig í svona leikjum.

Arsenij Buinickij má hugsa sinn gang eftir þennan leik. Hann hefði getað skorað þrennu ef hann hefði nýtt þau dauðafæri sem hann fékk. Slíkt er dýrkeypt fyrir lið sem búist er við að verði í fallbaráttu í sumar.

Leikmenn og áhorfendur voru stundum ósáttir með ákvarðanir dómarans en heilt yfir átti hann ágætan leik.