Bæði lið hefðu getað tekið stigin þrjú en jafntefli er líklega sanngjörn niðurstaða. Víkingar voru sjálfum sér verstir að láta jafna metin í bæði skiptin eftir að hafa náð forystunni tvisvar í fyrri hálfleik. Mark Jeppe Hansen rétt fyrir leikhlé breytti miklu og sá til þess að heimamenn gengju ekki til búningsklefanna með 2-1 forystu. Miðað við frábæran fyrri hálfleik var seinni hálfleikurinn afar leiðinlegur og talsvert færri færi litu dagsins ljós. Haukur Baldvinsson fékk þó dauðafæri til að tryggja Víkingi sigurinn undir lokin en brást bogalistin. Það sama má segja um Ólaf Karl Finsen hjá gestunum í uppbótartíma, þar sem hann skaut tvisvar í slána á tveimur sekúndum.

Atvik leiksins kom strax á fyrstu mínútu! Það var ótrúlegt að sjá Rolf Toft koma Víkingi yfir strax eftir einungis 20 sekúndur gegn sínum gömlu félögum! Sérstaklega magnað í ljósi þess að Stjarnan byrjaði meðp boltann.

Bæði lið eru taplaus það sem af er tímabils eftir fjórar umferðir og Stjarnan hefur ekki tapað í deildinni síðan árið 2013. Þessi úrslit þýða að Stjarnan missir toppsætið til FH-inga. Víkingur mun missa KR upp fyrir sig ef þeir síðarnefndu bera sigur úr bítum í Árbænum. Stjarnan er í 2. sætinu með 8 stig og Víkingur endar líklega kvöldið í 4. sæti með 6 stig.

Ólafur Karl Finsen, sá frábæri leikmaður, átti afar vondan dag í dag. Það gekk einfaldlega ekkert upp hjá honum. Hann missti boltann trekk í trekk og tókst aldrei að komast framhjá nokkrum manni. Lánleysið fullkomið þegar hann skallaði boltann í slána á lokasekúndunum. Getur svo sannarlega gert miklu betur en hann sýndi í dag.

Gunnar Jarl átti fínan leik í dag. Lét leikinn nokkuð fljóta og var alls ekkert að lyfta upp spjöldunum þó menn hefðu stundum beðið um það! Tvö stór atvik í leiknum þar sem Andri Rúnar virtist rangstæður í seinna marki Víkings og svo mögulega þegar Stjarnan átti að fá hendi. Erfitt að segja til um hvort þetta var rétt dæmt eða ekki. Leyfum honum og aðstoðarmönnum hans að njóta vafans.