Hafliði Breiðfjörð @haflidib

Textalýsing Skýrslan

Hvað réði úrslitum? Þeir skora sem þora stóð einhvers staðar og það snerist þessi leikur um. Grindavík gerði miklu meira í að skapa sér færi í leiknum og út úr því komu tvö góð mörk sem hefðu vel getað orðið fleiri. Gestirnir sáu aldrei til sólar og gerðu nánast ekkert fram á við. Bestu leikmenn 1. Ásgeir Þór Ingólfsson Ásgeir Ingólfs var flottur á miðjunni hjá Grindavík. Dreifði spilinu vel og skiptingar hans upp á kantana brjóta leikinn upp. Duglegur að vinna til baka líka og það er erfitt að taka af honum boltann. Hangir stundum aðeins of mikið á boltanum en er mikilvægasti hlekkurinn í liðinu þegar hann spilar eins og í dag. 2. Tomislav Misura Meistaradeildar Misura fékk viðurnefnið fyrir mörkin sem hann skoraði fyrir Neftchi Baku frá Azerbaijan gegn FH í Meistaradeildinni um árið. Núna raðar hann inn mörkunum í Grindavík og skoraði tvö mikilvæg mörk í dag. Með stoðsendingasérfræðinginn Alex Frey Hilmarsson fyrir aftan sig gætu mörkin orðið mörg í sumar. Atvikið Grindvíkingar voru mjög sáttir við stigið í lok leiks og gengu allir sem einn til stuðningsmanna og fögnuðu sigrinum vel upp við stúkuna. Þau eru öll í þessu saman í Grindavík.

Hvað þýða úrslitin? Grindavík er loksins komið á blað í deildinni og fyrstu þrjú stigin komin í hús. Mótið getur því byrjað hjá þeim. Grótta getur hreinlega ekki skorað mörk og hefur nú spilað fjóra fyrstu leiki mótsins, þrjá í deild og einn í bikar, án þess að skora mark. Ef þeir ætla að vera með í þessu móti þurfa þeir að setja í gang. Vondur dagur Kristján Ómar Björnsson hefði aldrei átt að mæta í þennan leik. Hann fór greiniega röngum megin framúr í morgun og var pirraður í skapinu allan þann tíma sem hann fékk á vellinum. Hann var búinn að rífast við dómarann, henda boltanum í Ásgeir Þór Ingólfsson og hafði vit á að fá skiptingu eftir að hann fékk áminningu á 35 mínútu, vitandi að það var stutt í rauða spjaldið. Samt hætti hann ekki og lét Valgeir dómara ganga 30 metra á eftir sér til að fá gula spjaldið og tuðaði líka eftir skiptinguna. Hefði betur verið heima setið... Dómarinn - 6 Ekkert besti leikur Valgeirs og hægt að setja spurningarmerki við nokkrar ákvarðanir í dag. Guðmundur Marteinn Hannesson slapp til dæmis vel við brottrekstur þegar hann braut á Misura sem var að sleppa einn í gegn og Valgeir hafði furðumikla þolinmæði fyrir Kristjáni Ómari.