Selfyssingar skora í upphafi leiksins en gefa síðan eftir í kjölfarið. Lítið um að vera í fyrri hálfleik og leyfðu Selfyssingar gestunum að stjórna leiknum. Það var allt annar bragur yfir Grindvíkingum í seinni hálfleik og fengu þeir mörg góð færi. Valgeir dæmdi tvær vítaspyrnur sem áttu alveg rétt á sér en Grindvíkinga nýttu bara aðra þeirra.

Seinni vítaspyrnan sem Grindvíkingar fá er atvik leiksins. Kristján Atli braut á Grindvíking en Misura sem skoraði úr vítaspyrnu rétt á undan, fór á punktinn en brást bogalistinn. Hefði getað komið Grindvíkingum yfir en klikkaði.

Úrslitin gera voða lítið fyrir bæði lið. Liðin bæði komin með 4 stig og í neðri hluta deildarinnar. Bæði lið þurfa að halda áfram að safna stigum ef ekki á illa að fara.

Nokkrir leikmenn sem áttu slæman dag en ekkert í líkingu við Valgeir dómara.

Valgeir Valgeirsson arfaslakur í dag. Lét leikinn ekkert fljóta, alltaf á flautunni og veifaði spjöldum sí og æ. Missti tökin á leiknum þegar hann var kominn í þennan vítahring. Vítaspyrnurnar sem hann dæmdi voru þó báðar réttar og lítið hægt að setja útá hann í sambandi við þær.