Viktor Jónsson. Þessi mikli markaskorari sást ekki allan leikinn en hann nýtti færið sitt frábærlega þegar það kom á 85. mínútu. Grindvíkingar höfðu verið betri í síðari hálfleiknum en Þróttarar refsuðu þeim í lokin.

Dauðafæri sem Óli Baldur Bjarnason fékk á 82. mínútu en Trausti Sigurbjörnsson varði. Það átti eftir að reynast dýrkeypt fyrir Grindvíkinga.

Þróttarar eru með fullt hús stiga eftir fimm leiki og með þriggja stiga forskot á toppi deildarinnar. Grindvíkingar sitja eftir í tíunda sæti með fjögur stig og þeir þurfa að ná fleiri stigum ef fallbarátta á ekki að vera niðurstaðan í sumar.

Omar Koroma átti mjög slaka innkomu síðasta hálftímann hjá Þrótti og nánast ekkert gekk upp hjá honum. Omar kom inn á fyrir Dion Acuff sem átti ekki góðan dag heldur en hann klúðraði ótrúlegu færi í fyrri hálfleiknum.

Ágætis frammistaða hjá Valda. Hélt sömu línu allan leikinn og var lítið að draga upp spjöldin af óþörfu.