Hvorugt liðið náði að skemmta áhorfendum í fyrri hálfleik og fátt var um færi. Það virkaði eins og íslensku strákarnir væru smá ragir en í seinni hálfleik brutust þeir út úr skelinni, sýndu gæði sín og færin komu á færibandi. Mörkin urðu þrjú og skemmtanagildið í hámarki. Takturinn fannst og þá sást bersýnilega hvort liðið er betra!

Ísinn brotinn! Eftir bragðdaufan fyrri hálfleik komu strákarnir gíraðir í seinni hálfleikinn og brutu ísinn þegar Elías Már Ómarsson skoraði með hörkuskalla eftir frábæra fyrirgjöf Bödda löpp.

Óskabyrjun sem gefur tóninn í riðlinum. Eins og strákarnir töluðu um sjálfir fyrir leikinn þá var mikilvægt að byrja vel og ef liðið ætlar sér hluti í þessum riðli verður að vinna Makedóníu á heimavelli. Góð frammistaða.

David Babunski fyrirliði Makedóníu. Þessi strákur er á mála hjá Barcelona en náði engan veginn að sýna það í þessum leik. Sendingar hans oft á tíðum mjög misheppnaðar og hann heillaði engan á Vodafone-vellinum.

Erfiðleikastuðullinn fyrir norska dómarann var ekki hár. Gerði sárafá mistök og í raun reyndi ekki mikið á hann.