Arnar Daði Arnarsson @arnardadi

Textalýsing Skýrslan Viðtöl

Hvað réði úrslitum? KA fundu leið framhjá Gunnleifi markverði Blika á meðan Blikarnir fundu ekki glufu framhjá Rajko í marki KA. Heilt yfir var þetta jafn leikur þar sem bæði lið fengu fín færi. Eftir að KA komst yfir í byrjun framlengingarnar, jókst krafturinn í sókn Blika en það dugði ekki til. Bestu leikmenn 1. Srdjan Rajkovic Markvörðurinn, síungi gjörsamlega lokaði rammanum, þá sérstaklega í framlengingunni. Leikmenn Blika hefðu ekki getað keypt sér mark á meðan Rajko var á vaktinni í marki KA. Hefur fengið fá tækifæri hjá KA það sem af er tímabili en með svona frammistöðu verður erfitt fyrir Bjarna að bekkja hann í næsta deildarleik. 2. Archange Nkumu Var gagnrýndur fyrir sína frammistöðu á undirbúningstímabilinu en hefur verið vaxandi hjá KA í sumar. Stór og stæðilegur og hleypir fáum framhjá sér sem djúpur miðjumaður. Er síðan lygilega lunkinn með boltann, þrátt fyrir hæð sína. Hélt boltanum vel í leiknum og var akkerið á miðjunni hjá KA. Atvikið Srdjan Rajkovic varði í þrígang á stuttum tíma í seinni hálfleik framlengingarnar. Í tvígang varði hann af meters-færi, fyrst frá Höskuldi og í seinna skiptið frá Ellert Hreinssyni.

Hvað þýða úrslitin? Breiðablik sem hafa verið á fljúgandi siglingu eru dottnir úr Borgunarbikarnum á meðan KA verður eina neðri deildarliðið í pottinum þegar dregið verður í 8-liða úrslit í hádeginu á morgun. Vondur dagur Ellert Hreinsson sofnar líklega seint í kvöld. Í fyrri hálfleik fékk hann tvö mjög góð færi og í seinni hálfleik og í framlengingunni sjálfri óð maðurinn í opnum marktækifærum en hann fann ekki leið framhjá Rajko í marki KA, eins og fleiri í liði Blika. Á venjulegum degi hefði Ellert getað skorað 2-3 mörk. Dómarinn - 7,1 Leysti verkefnið vel í kvöld. Hefði hæglega getað lyft fleiri spjöldum í leiknum en hélt línunni og leyfði meira en maður hefur séð.