Reynsluleysið og varnarmistök urðu Haukum að falli í kvöld. Bæði mörk Þróttara sem komu snemma leiks voru heldur auðveld. Þegar upp var staðið reyndist þetta dýrkeypt því heilt yfir voru Haukar betri aðilinn í leiknum.

Skalla mark Viktors Jónssonar á 3. mínútu leiksins. Haukarnir mættu full seint til leiks í kvöld og það nýttu Þróttarar sér. Mark Viktors það áttunda í deildinni og hann heldur áfram að raða inn mörkum fyrir Þróttara í sumar.

Þróttarar styrkja stöðu sína á toppi deildarinnar með sigrinum, þar sem Ólafsvík gerði 1-1 jafntefli við KA í kvöld. Lið sem eru í baráttunni við Þrótt um efstu tvö sætin í deildinni. Haukar eru áfram í fínum málum um miðjan deild.

Daníel Snorri Guðlaugsson og Gunnlaugur Fannar Guðmundsson klóra sér líklega í hausnum í kvöld, þegar þeir hugsa til annars marks Þróttar í leiknum. Þeir hoppuðu báðir upp í skallabolta innan teigs sem endaði með því að Dion Acoff fékk boltann og nýtti sér mistök Daníels og Gunnlaugs og skoraði framhjá Terrance í markinu.

Bæði lið voru óánægð með töluvert margar ákvarðanir hjá Gunnari Sverri í leiknum í kvöld og það skal engan undra. Ekki voru ákvarðanir aðstoðardómara leiksins að hjálpa til. Haukar fengu að toga og sparka í leikmenn Þróttar oft á tíðum án þess að nokkuð væri dæmt. Þróttarar sluppu einnig við nokkur brot. Döpur dómgæsla en hallaði á hvorugt liðið.