Slakur fyrri hálfleikur Þórsara. Komu sér í vandræði með því að mæta ekki til leiks í fyrri hálfleik. Liðsmenn Grindavíkur gjörsamlega völtuðu yfir þá og gátu Þórsarar vel við unað að vera ,,bara" 3-1 undir í hálfleik. Heimamenn gerðu þó vel í seinni hálfleik, komu sér inn í leikinn og hefðu átt að jafna hann. Maciej Majewski tryggði gestunum þó stigin 3 með því að verja vítaspyrnu í uppbótartíma.

Sjaldan verið auðveldara að velja þetta. Vítaspyrnan sem Þórsarar fengu á 95. mínútu. Bergvin Jóhannsson féll í teignum og margir héldu að stórkostleg endurkoma yrði fullkomnuð. Svo var hins vegar ekki því Jóhann Helgi lét Majewski grípa frá sér.

Þórsarar eru í fimmta sætinu, það breyttist ekkert í kvöld. Þeir hafa nú tapað þremur leikjum í röð og virðast vera að koma sér i vandræði. Mikið er um meiðsli í hóp þeirra og þeir eiga ekki auðvelda leiki framundan gegn Selfossi, nágrönnunum í KA og toppliði Þróttar. Grindvíkingar virðast hins vegar vera að vakna eftir vægast sagt dapra byrjun á mótinu. Leikurinn í kvöld var þriðji sigurleikurinn í síðustu 4 og útlitið er bjartara á Suðurnesjunum. Með sigrinum í kvöld lyftu þeir sér upp í 6. sætið.

Jóhann Helgi Hannesson. Sást lítið sem ekkert til hans í leiknum, ógnaði ekki mikið en barðist þó eins og venjulega. Hann fær þennan tiltil aðallega fyrir vítaspyrnuklúðrið á gríðarlega mikilvægum tíma.

Ívar Orri gerði engin afdrifarík mistök, hélt tökunum á leiknum en missti sig stundum á flautunni á köflum. Hefði mátt leyfa leiknum að fljóta aðeins betur, annars ekkert að setja út á hann.