Stjarnan var betra liðið í dag frá fyrstu mínútu. Liðið skapaði sér mikið fleiri færi og sigurinn hefði getað verið stærri. Loksins frammistaða sem minnti okkur á síðasta ár. ÍBV tók skref til baka í dag eftir nokkur skref fram á við í síðustu leikjum.

Gunnar Heiðar Þorvaldsson fór meiddur útaf í hálfleik eftir að hafa fengið högg á löppina í fyrri hálfleiknum. Merkilegast við það er að Gunnar fékk gult spjald fyrir leikaraskap. Garðar Örn Hinriksson ákvað að bjóða hann velkominn heim úr atvinnumennsku.

Stjörnumenn unnu loksins heimaleik en þeir skelltu sér upp í sjötta sæti og hafa þeir 19 stig. Það er ekki alltof langt í efstu liðin og hver veit nema þeir blandi sér í toppbaráttu undir lokin. Eyjamenn eru ennþá í fallslag upp á líf og dauða en þeir fara aftur í fallsæti ef Leikni tekst að vinna eða gera jafntefli gegn ÍA í kvöld.

Gunnar Heiðar Þorvaldsson fær þetta. Ekki vegna þess að hann var eitthvað sérlega lélegur en þegar þú er spjaldaður fyrir dýfu sem verður til þess að þú þarft að fara útaf vegna þess að þú meiddist, þá ertu að eiga vondan dag.

Heilt yfir var Garðar Örn Hinriksson ekki sérlega lélegur í þessum leik, það eru einstaka atvik sem draga hann niður og þá sérstaklega atvikið með Gunnari Heiðari sem var stórfurðulegt. Hann hafði stjórn á leiknum allan tímann en, þú færð ekki yfir fimm ef þú gerir svona vitleysu eins og í atvikinu með Gunnar Heiðar.