Gríðarlega vel skipurlagt og vel spilandi lið Fjölnis gerði það að verkum að þeir fóru með öruggan sigur í kvöld á Fylkismönnum sem áttu erfitt frá fyrstu mínútu. Fylkisliðið virtist eiga í miklum erfiðleikum með að koma sendingum manna á milli og gekk ekkert upp hjá þeim. Algjört þrot í sóknarleik liðsins og skapaði liðið sér varla sókn í öllum leiknum. Fjölnismenn voru ákveðnir frá fyrstu mínútu leiksins og fann maður það alla leið upp í fréttamannastúku að þeir ætluðu sér að fá 3 stigin í kvöld.

Mark 2 hjá Fjölni er óumdeilanlega það sem er atvik leiksins. Ásgeir Örn sendir boltann til baka á Ólaf Íshólm. Sendingin var gríðarlega slök og móttaka Ólafs slæm. Hann reynir svo að skjóta boltanum fram en skýtur beint í Chopart sem átti ekki í vandræðum að koma boltanum fram hjá Ólafi og i markið. Stórundarlegt mark og eins og Hermann Hreiðars sagði réttilega etir leik, gjöf til Fjölnismanna.

Fjölnismenn fóru yfir Fylki í stigastöflunni og eru komnir í 5. sætið og það sem meira er, þeir enduðu 4 leikja taphrinu sína í kvöld og eygja enn möguleika á því að enda í sæti sem gæfi þeim rétt á að leika í Evrópu næsta sumar. Fylkismenn töpuðu fyrsta leik undir stjórn Hemma og fóru niður í 6. sæti deildarinnar. Leikur liðins var ekki góður í kvöld og þurfa þeir að berja sig aftur saman í andlitinu ef þeir ætla sér að halda í við liðin fyrir ofan sig.

Fylkisliðið allt saman átti vondan leik og var Ásgeir Örn fremstur í flokki þeirra sem átti slakan leik.

Þóroddur var barasta fínn í kvöld. Maður varð ekkert var við hann og því ekkert yfir honum að kvarta.