Gæðin fram á við. Þegar liðin komust yfir miðju kom gæðamunur í ljós. Stjarnan nýtti færin sín og skoraði 4 mörk á meðan Þórs/KA-stúlkur voru í basli með að koma sér í færi og klára.

Sjálfsmark Ágústu Kristinsdóttur. Braut ísinn strax á 8. mínútu og róðurinn var þungur eftir það fyrir Þór/KA. Það er ekkert grín að lenda undir gegn Stjörnunni.

Það stefnir allt í að Stjarnan lendi í öðru sætinu. Það er langt upp í toppinn og langt niður í 3. sætið. Þór/KA er í harðri baráttu við Selfoss um 3.sætið. Selfyssingar unnu í kvöld og fóru þar með upp fyrir Norðanstúlkur.

Sandra María Jessen. Besti leikmaður Þórs/KA sást ekki í dag. Leikmaður sem er jafn mikilvægur liði sínu og hún er, verður að standa sig í stórleikjum sem þessum. Hún virtist eiga í erfiðleikum með að finna svæði til að bjóða sig í og þegar hún fékk boltann kom lítið út úr því.

Eins og Jóhann Kristinn sagði í viðtali eftir leik var þetta kannski ekki erfiðasti leikurinn til að dæma en Gunnar Helgason stóð sig engu að síður með stakri prýði. Engin áberandi mistök í leiknum en ekki fullkomið samt sem áður.