Stjarnan var án nokkurs vafa betra liðið í leiknum og gestirnir heppnir að sleppa með núllið inn í hálfleikinn. Herslumuninn vantaði hjá Garðbæingum lengst af en ótrúleg breidd liðsins og stjörnum prýddur bekkur lönduðu þessu. Veigar Páll Gunnarsson var hetjan, kom tilbúinn af tréverkinu og kláraði dæmið.

Brotið og rauða spjaldið sem Ásgeir Eyþórsson fékk. Skyndilega voru Fylkismenn orðnir tíu og Veigar Páll fékk aukaspyrnu á hættulegum stað sem hann nýtti sér vel. Ísinn brotinn.

Rúnar Páll, þjálfari Stjörnunnar, hefur talað mikið um mikilvægi þess að byrja mótið vel. Það gerðu Stjörnumenn svo sannarlega. Pressan var á þeim í kvöld og þegar upp var staðið stóðust þeir hana.

Margir biðu spenntir eftir því að sjá Spánverjann Sito spreyta sig en rispurnar frá honum voru sárafáar. Garðbæingar náðu að loka vel á þetta hættulega sóknarvopn Árbæinga og Albert Brynjar Ingason fékk úr sáralitlu að moða. Fylkismenn voru nánast bitlausir.

Valdimar Pálsson átti fínan dag og var ekki of mikið í sviðsljósinu. Nokkrar umdeilanlegar ákvarðanir þó.