Elvar Geir Magnússon @elvargeir

Textalýsing Skýrslan Viðtöl

Hvað réði úrslitum? Gríðarleg vinnusemi Blika, miðverðirnir gríðarlega öflugir. Gott svar frá leikmönnum eftir tapið svekkjandi gegn nýliðum Þróttar í umferðinni á undan. Markið var vel flott. Góður skalli eftir frábæran undirbúning Davíðs Kristjáns. Bestu leikmenn 1. Damir Muminovic Sýndi það að hann er einn allra besti varnarmaður deildarinnar. Var hrikalega öflugur í hjarta varnar Kópavogsliðsins. Leikmaður sem hefur vaxið gríðarlega. Var magnaður í fyrra og heldur stöðugleika. 2. Davíð Kristján Ólafsson Kom inn í vinstri bakvörðinn vegna leikbanns Arnórs Sveins Aðalsteinssonar. Átti virkilega flottan leik, hélt Óskari Erni Haukssyni niðri og lagði upp eina markið á glæsilegan hátt. Atvikið KR skoraði mark sem var ótrúlega ranglega dæmt af. Bjarki Óskarsson aðstoðardómari flaggaði rangstöðu og í raun með hreinum ólíkindum hvernig hann fékk það út. Þarna hefði KR átt að jafna metin og atvikið RISASTÓRT.

Hvað þýða úrslitin? Stigasöfnun KR gengur ekki vel. Liðið hefur aðeins unnið einn leik í fyrstu fimm umferðunum. Blikar svöruðu eftir slæmt tap gegn Þrótti og náðu að klífa upp töfluna. Þeir vilja taka þátt í titilbaráttunni og þessi sigur því gríðarlega mikilvægur. Vondur dagur Hólmbert Aron Friðjónsson á enn eftir að komast á blað í Pepsi-deildinni og er með eitt mark í fjórtán síðustu leikjum sínum. Hann fann sig ekki og var tekinn af velli þrátt fyrir að KR þurfti á marki að halda. Sóknarlega hefðu KR-ingar viljað skapa sér mun meira og þurfa að fá meira út úr mönnum eins og Óskari Erni. Sóknarleikur KR fær algjöra falleinkunn. Dómarinn - 5 Ívar Orri stóð sig alls ekki illa í þessum leik en það verður að draga hann niður vegna mistaka aðstoðardómarans. Það er atvikið sem um ræðir og dregur teymið niður.