Fyrsta mark leiksins breytti honum töluvert. KR náðu þá föstu gripi á leik sem var í járnum, gengu á lagið og skoruðu annað auk þess að hafa getað bætt við. Áhlaup Valsmanna kom alltof seint.

Mikill hasar á köflum, heimamenn trylltust eftir viðskipti Bjarna Ólafs og Óskars Arnar, vildu meina að olnbogi hafi þar farið í andlit af vilja. Þorvaldur var alls ekki sammála því en stúkan baulaði það sem eftir var leiks á bakvörðinn knáa.

Pressunni af þjálfarateymi KR er létt í bili og þeir færast upp í efsta pakka deildarinnar. Valsmenn verða ekki ofar en í 9.sæti eftir 6 umferðir með einungis 7 stig...pressan kannski að færast þangað úr Vesturbænum?

Af ýmsu að velja hjá Val en ég held að ég geti ekki litið framhjá Nicolaj Hansen. Hann átti alveg arfaslakan dag og Björgvin Stefáns gerði svo miklu meira á sínum 25 mínútum en Daninn gerði fram að því. Þarf að gera miklu betur.

Það eru ekkert allir dómarar sem ná að halda línu í gegnum leik sem inniheldur tæklingar, baráttu og pirring á rennandi blautu grasi. Mér fannst teymið halda línu allan leikinn og þurfti að taka margar stórar ákvarðanir í leiknum, sem þeir gerðu vel.