Það er eins og liðunum leið illa að vera með forystuna. Fjölnir komst yfir snemma leiks með marki Gunnars Más en eftir það tók Valur öll völd á vellinum og náði að jafna. Í seinni hálfleik komst Valur svo í 2-1 en eftir þá tók Fjölnir öll völd á vellinum og náði að jafna. Sanngjarnt 2-2 jafntefli varð svo niðurstaðan.

Jöfnunarmark Fjölnis í blálokin. Gunnar Már lagði boltann á Birni Snæ Ingason sem kláraði stórglæsilega í bláhornið og tryggði Fjölni stig.

Fjölnismönnum gengur illa að halda sér í toppbaráttunni en liðið er nú fimm stigum á eftir FH eftir þrjá leiki í röð án sigurs. Valsmenn eru í 8. sæti, tíu stigum frá toppnum og verður það að teljast vonbrigði þar á bæ.

Kristian Gaarde - Hefur ekki alveg slegið í gegn eftir að hann kom til Vals. Hann byrjaði annan leikinn sinn í röð en var tekinn útaf eftir tæplega klukkutíma leik en hann sýndi ekki mikið í kvöld. Ólafur Jóhannesson verður svo að vera nefndur en hann brást illa við spurningum fréttamanns og lét hann heyra það. Þjálfarar eiga að sýna meiri klassa.

Þóroddur var heilt yfir góður í dag. Hann gaf aðeins eitt spjald og hafði alla stjórn á leiknum. Valsmenn vildu fá víti í fyrri hálfleik er boltinn virtist fara hendina á Gunnari Má en það hefði hugsanlega verið strangur dómur.