Leikmenn ÍBV mættu sterkir til leiks eftir skellinn uppi á Skaga. Þeir voru grimmari, áræðnari og einfaldlega betri í dag. FH var í góðum möguleika allan leikinn en fóru illa með góð færi og oft á tiðum of seinir í marga bolta.

Simon Smidt eða Bikar-Smidt eins og hann er stundum kallaður skoraði sigurmarkið á 40. mínútu. Þá varð FH á í varnarleiknum þegar Simon gleymdist og hann refsaði þeim.

ÍBV er komið í úrslitaleikinn í fyrsta skiptið í rúman áratug og mæta þar Valsmönnum í hörkuleik. FH-ingar sitja eftir með sárt ennið.

Kristján Flóki Finnbogason kom inn í byrjunarliðið í stað Bjarna Þórs á síðustu stundu en hann kom ekki með kraftinn í sóknina sem vonast var eftir. Auk þess að varnarmenn ÍBV héldu honum í skefjum allan leikinn kórónaði hann kvöldið með því að láta reka sig af velli á lokamínútunum.

Vilhjálmur Alvar átti í nógu að snúast í dag. Oft var misræmi í dómgæslunni en hann gerði rétt í ákvörðununum sem skiptu máli. Gaf mönnum réttilega spjöld þegar við átti en var samt alltaf með stjórn á leiknum þrátt fyrir hita í mönnum. Gerði svo hárrétt í því að reka Kristján Flóka af velli í uppbótartíma fyrir heimskulegt brot.