Leikurinn var yfir höfuð frekar jafn og var lítið um afgerandi færi og þá sérstaklega í seinni hálfleik. Stjarnan var þó sterkari aðilinn þegar lítið var eftir en kæruleysi í vörn Stjörnunnar urðu til þess að Blikar náðu að nýta fast leikatriði og tryggja sér sigurinn í lokin.

Sigurmark Blika. Eyjóflur Héðinsson brýtur af sér á miðjum vellinum undir lokin og nokkrum augnablikum síðar var Oliver Sigurjónsson búinn að lyfta boltanum á kollinn á Höskuldi Gunnlaugssyni sem skoraði með mjög góðum skalla.

Breiðablik er nú fjórum stigum á eftir toppliði FH og eru liðið í 2. sæti. Tapi FH á móti Víkini Ó. á morgun getur Breiðablik minnkað þetta niður í eitt stig er liðin mætast í næstu umferð og Breiðablik því ekki úr leik í titilbaráttunni. Stjarnan hefur hins vegar sagt sitt síðasta í ár ef litið er til Íslandsmeistaratitilsins.

Hólmbert Aron Friðjónsson er búinn að eiga erfitt sumar en hann svaraði gagnrýnisröddum með að skora tvö mörk í síðasta leik. Í dag gengu hlutirnir hins vegar ekki fyrir hann og fékk hann úr litlu að moða. Guðjón Baldvinsson var ekki með í dag og hafði það klárlega áhrif á sóknarleik Stjörnunnar.

Þorvaldur Árnason heldur áfram að vera einn allra besti dómari deildarinnar þetta árið. Mjög öruggur í þessum leik.