Það var miklu meiri grimmd og ákefð í ÍBV í dag. Eyjamenn unnu flest einvígi og Valsmenn mættu bara alls ekki til leiks enda skein munurinn á liðunum í gegn.

Aron Bjarnason kórónaði frammistöðu sína með þriðja marki sínu undir lok leiks. Elvar Ingi sem kom einnig sterkur inn lagði boltann þá fyrir hann og Aron gat ekki annað en sett boltann í netið.

Valsmenn eru öruggir með Evrópusæti og ÍBV þarf einungis stig í lokaumferðinni til að tryggja sæti sitt í deild þeirra bestu á næsta ári.

Rasmus Christiansen hefur átt betri daga á skrifstofunni, en hann hefði getað gert ýmislegt betur í mörkum Eyjamanna. Sóknarlína Vals einnig í miklu basli í leiknum og skapaði sér ekki mikið af færum.

Pétur Guðmundsson átti að dæma síðasta heimaleik ÍBV en það breyttist. Í staðinn dæmdi hann þennan leik og stóð sig með stakri prýði. Var ekki að missa sig í neina spjaldagleði og leyfði leiknum að fljóta mjög vel. Þá man ég ekki eftir neinum slæmum ákvörðunu hjá honum í dag.