Það var mark Hans Viktors Guðmundssonar á 61. mínútu sem réði úrslitum. Igor Jugovic skaut í bakið á Hans og þaðan fór boltinn í markið. Þéttur varnarleikur heimamanna var lykillinn að sigrinum. Þetta var klassískur baráttuleikur tveggja liða og hefði sigurinn getað dottið báðum megin.

Ég ætla að skrifa atvikið á tvöfalda skiptingu Fjölnis. Hún virkaði vel. Ægir Jarl og Marcus Solberg komu inn á meðan þeir hvíldu Taskovic og Gunnar Már.

Fjölnir er með hreint lak eftir tvær umferðir og fjögur stig. Þórður Ingason og vörnin er helsti styrkleiki liðsins núna en færanýtingin mætti vera betri fram á við. Blikar eru aftur á móti án stiga eftir tvær umferðir. Blikar geta þó tekið nokkra jákvæða punkta úr leiknum. Davíð Kristján Ólafsson og Viktor Örn Margeirsson voru báðir öflugir. Viktor stóð sig vel í miðverðinum og Davíð sömuleiðis í bakverðinum. Martin Lund Pedersen var hættulegur og var oft að koma sér í góðar stöður. Þórir Guðjónsson var þá hættulegastur Fjölnismanna fram á við, hélt bolta vel og erfitt að eiga við hann.

Hrvoje Tokic var ekkert sérstaklega góður í kvöld. Hann fékk nokkra sénsa en nýtti illa og þarf að koma sér í gang ef Blikar ætla sér einhverja hluti. Höskuldur kom inn í liðið en það býr miklu meira í honum en hann sýndi í Grafarvogi.

Frammistaðan til fyrirmyndar.