Mist Rúnarsdóttir @MistRunarsdotti

Textalýsing Skýrslan Viðtöl

Hvað réði úrslitum? Leikplanið hjá Breiðablik gekk algjörlega upp. Blikar leyfðu Val að halda boltanum og voru svo stórhættulegar í skyndisóknum þegar tækifæri gáfust. Bestu leikmenn 1. Svava Rós Guðmundsdóttir Svava naut sín vel í kvöld og var mjög ógnandi í hröðum skyndisóknum Blika. Hún lagði upp tvö mörk og skoraði eitt gullfallegt. 2. Sonný Lára Þráinsdóttir Sonný var öryggið uppmálað í marki Breiðabliks og hélt hreinu. Hún átti tvær gríðarlega mikilvægar vörslur í stöðunni 1-0 þar sem Valur hefði hæglega getað jafnað og snúið leiknum sér í hag. Atvikið Þau eru tvö. Annars vegar markvarslan hjá Sonný á lokamínútu fyrri hálfleiks. Blikar geta þakkað henni fyrir að fara með forystuna inn í leikhlé. Hinsvegar markið hennar Svövu Rósar. Hún lagði boltann hægra megin framhjá Hrafnhildi og hljóp svo vinstra megin við hana þar sem hún tók við boltanum og skoraði framhjá Söndru. Frábært einstaklingsframtak.

Hvað þýða úrslitin? Blikar halda í við Þór/KA en Valsarar dragast aftur úr og eru aðeins með 3 stig eftir þrjár fyrstu umferðir mótsins. Það er vissulega nóg eftir af mótinu ennþá en vont fyrir lið sem ætlar sér að vera í toppbaráttu að dragast svona aftur úr strax í upphafi móts. Vondur dagur Úlfur Blandon þjálfari Vals var skiljanlega hundfúll eftir tapið. Það gekk allt upp hjá andstæðingunum og Valsliðið réði illa við skyndisóknir Blika. Úlfur var fljótur í burtu eftir leik og gaf fjölmiðlum því ekki kost á viðtali. Það er ekki til eftirbreytni og ósanngjarnt að það lendi á ungum leikmanni að þurfa að svara fyrir tapið. Dómarinn - 8 Solid frammistaða hjá tríóinu og ekki yfir neinu stórkostlegu að kvarta.