Bjarni Þórarinn Hallfreðsson @BjarniThorarinn

Textalýsing Skýrslan Viðtöl

Hvað réði úrslitum? Grindavík er einfaldlega betri í fótbolta en Völsungur. Það sást greinilega í leiknum hvaða lið var í Pepsi-deildinni og hvaða lið var í 2. deildinni. Grindavík voru rosalega öflugir í þessum leik og var ekki vottur af vanmati að finna hjá þeim. Völsungur sýndi þó góða takta á köflum og komu kaflar þar sem liðið spilaði afar vel innan liðsins. Ef þessu leikur hefði farið fram í eðlilegum aðstæðum hefði Grindavík alltaf unnið leikinn, en aldrei svona stórt. Bestu leikmenn 1. William Daniels Allir leikmenn Grindavíkur áttu virkilega góðan leik í kvöld. En þetta gefur auga leið. William skoraði fjögur mörk í kvöld og hefði hæglega getað skorað fleiri. 2. Sam Hewson Leikmaðurinn með mestu gæðin á vellinum í kvöld. Virtist vera á svona 60% tempói en var samt bestur. Var tekinn útaf snemma. Virkilega mikilvægur leikmaður í þessu Grindavíkurliði. Atvikið Þriðja mark Grindavíkur. Völsungur pressaði Grindavík hátt upp á völlinn og voru allir útileikmenn liðanna beggja á síðasta þriðjung vallarins á vallarhelmingi Grindavíkur. Það þurfti hins vegar ekki nema ca. 3 sendingar og allt lið Völsungs var sundurspilað. Gunnar Þorsteinsson stakk alla af og ekki er Gunnar þekktur fyrir að vera snöggur. Gunnar gerði vel og rúllaði boltanum á Sam Hewson í stað þess að skora sjálfur. Set hins vegar spurningarmerki við markið því ég held að Hewson hafi verið rangstæður.

Hvað þýða úrslitin? Grindavík verður í pottinum þegar dregið verður í 16-liða úrslit Borgunarbikarsins. Það var rosalega gaman að horfa á ungu strákana hjá Grindavík í dag. Fjórir leikmenn voru að spila sína fyrstu leiki og þrír þeirra eru fæddir árið 2000. Sigurjón Rúnarsson spilaði allan leikinn og stóð hann sig með mikilli prýði. Dagur Ingi kom ákaflega ferskur inn á í síðari hálfleik og Ingi Steinn og Adam Frank skiluðu sínu. Verður gaman að fylgjast með þessum strákum í framtíðinni. Vondur dagur Mér dettur ekki til hugar að setja Völsungsliðið hér. Það er ekkert grín að ferðast alla þessa leið frá Húsavík til Grindavíkur og fá svona veður til þess að spila fótbolta. Þeir eiga stórt hrós skilið. Hefði hins vegar viljað sjá þá nýta hornin sín betur. Þeir fengu fullt af hornspyrnum og flestar þeirra voru afleitar. Hefði verið hægt að setja nokkur mörk úr þessum spyrnum í þessum vindi. Vondi dagurinn fær hins vegar norðanáttin. Lognið fer oft hratt yfir í Grindavík en aldrei hefur maður séð svona mikið rok í fótboltaleik hérna. Það var ótrúlegt að horfa á þetta og maður veltir því fyrir sér hvort það eigi yfirhöfuð að spila fótboltaleik í svona veðri. Þetta var ekki fólki bjóðandi. Dómarinn - 7 Ekkert út á hann að setja. Stóð sig vel við erfiðar aðstæður. Leyfði leiknum að fljóta og var ekkert mikið í að stöðva hann af óþörfu. Spjöldin voru flest hver hárrétt. Reyndi ekki mikið á hann þannig séð.