Þór/KA er einfaldlega heitasta liðið á Íslandi í dag. Þær lentu í mótlæti strax á þriðju mínútu þegar þær fengu á sig mark á einum erfiðasta útivelli deildarinnar. Þær létu það þó ekki slá sig útaf laginu heldur sýndu þær gríðarlegan karakter, efldust við mótlætið og unnu að lokum sanngjarnan sigur sem tryggir þeim áframhaldandi veru á toppnum.

Það koma upp nokkur örlagarík augnablik í leiknum. Annað mark Þórs/KA kemur á fullkomnum tíma fyrir liðið og hjálpar þeim inn í síðari hálfleikinn. Sigrún Ella fékk kjörið tækifæri til að jafna leikinn fyrir Stjörnuna snemma í síðari hálfleik en nýtti ekki færið sem hefði getað breytt leiknum. Einnig verður það að teljast til stórra tíðinda að Harpa Þorsteinsdóttir kom inná í framlínu Stjörnunnar, eitthvað sem margir hafa beðið með eftirvæntingu.

Þór/KA heldur áfram að skrifa sömu fyrirsagnirnar. Liðið er með fullt hús stiga í efsta sætinu. Það er ekki nóg með að liðið sé búið að vinna sjö fyrstu leiki sína heldur hafa þær líka unnið öll liðin sem spáð var í titilbaráttu. Það er engin tilviljun sem ræður því. Með sigri hefði Stjarnan getað skotist á toppinn en þær verða að halda áfram í eltingaleik. Bæði lið geta svo glaðst yfir því að hinir helstu keppinautar þeirra í Breiðablik töpuðu stigum.

Langflestir leikmenn Stjörnuliðsins áttu vondan dag og alltof margir einstaklingar langt frá sínu besta. Kim Dolstra var áberandi slök en það var helst félagi hennar í miðri Stjörnuvörninni, Anna María Baldursdóttir, sem komst þokkalega frá leiknum. Flestar aðrar langt undir pari.

Helgi Mikael klikkaði ekki á neinu stóru en eins og gengur og gerist komu upp minni atvik sem fólk var ekki sammála um.