Tvö af mörkunum þremur sem Þróttur skoraði væri hægt að skrifa á einstaklingsmistök meðal leikmanna Gróttu. Það mætti segja að mistök Gróttumanna hafi kostað þá í dag.

Atvik leiksins er vafalaust þegar Þróttarar skora sitt annað mark á 66. mínútu, nokkuð gegn gangi leiksins. Gróttumenn töldu sig hafa átt að fá aukaspyrnu áður en Sveinbjörn slapp í gegn og gjörsamlega trompuðust þegar markið fékk að standa. Erfitt að dæma um hvort að Gróttumenn hafi haft eitthvað til síns máls.

Úrslitin senda Þrótt upp á topp deildarinnar með 9 stig eftir fjórar umferðir. Grótta situr sem fastast í níunda sæti með þriggja stiga forskot á ÍR og Leikni Fáskrúðsfjörð fyrir neðan.

Vörn Gróttu átti ekki góðan dag og er hægt að skrifa tvö af mörkunum þremur á einstaklingsmistök. Ef Gróttumenn ætla að halda sér í deildinni verða þeir að gera betur á Vivaldivellinum en í fyrra fékk liðið aðeins 10 mörk á sig í 11 heimaleikjum í 2. deildinni.

Dómarinn átti frekar vondan dag í dag. Hann var flautuglaður en missti samt af nokkrum mikilvægum atriðum (meðal annars atvikinu) og hefði getað dæmt víti fyrir Gróttu.