Dugnaður og skipulag tryggði Grindvíkingum þrjú stig í kvöld. Óli Stefán lagði upp leikinn frábærlega og sóknarleikur Vals átti fá svör við vörn Grindavíkur.

Um miðjan seinni hálfleik komst Sigurður Egill í gegnum vörn Grindavíkur en Aron Freyr elti hann uppi og braut á honum, að því virðist inn í vítateig. Þorvaldur dómari benti á punktinn en breytti svo snögglega um skoðun og dæmdi aukaspyrnu, rétt fyrir utan vítateig. Aðstoðardómarinn virðist hafa ráðið þessu. Vítaspyrna á þessum tímapunkti og mögulegt mark hjá Val hefði gjörbreytt leiknum.

Grindavík og Valur var spáð á ólíkan stað fyrir tímabilið. Grindavík var spáð falli en Val var spáð í titilbaráttu. Eftir fimm umferðir eru liðin hins vegar jöfn á stigum í 2. til 3. sæti. Enginn hefði getað trúað því fyrir mót. Ef Grindavík spilar líkt og þeir gerðu í dag, er ekki nokkur möguleiki á því að liðið falli úr Pepsi-deildinni.

Það var enginn sem átti einhvern arfaslakan leik í kvöld svo það er erfitt að setja einhvern í vondan dag. Þann vafasama heiður fær hins vegar Anton Ari, markvörður Vals. Anton átti flottan fyrri hálfleik og varði oft vel. Annað var hins vegar upp á teningnum í þeim síðari. Anton átti að gera töluvert betur í marki Andra Rúnars og þá virtist hann eiga erfitt með grípa boltann í seinni hálfleik. Alexander Veigar hefur einnig átt betri leiki í liði Grindavíkur en hann fékk tvö gul spjöld, og þar með rautt í kvöld.

Þorvaldur hefur átt betri leiki. Lína hans var frekar óljós í leiknum, en hann dæmdi oft á tíðum þegar hann þurfti ekki að dæma, og dæmdi ekki þegar hann þurfti þess. Þá benti hann á vítapunktinn er brotið var á Sigurð Egil, en breytti svo um skoðun.