Fylkir er einfaldlega með betra einstaklinga í sínu liði, leikmenn sem geta klárað leiki á stuttum tíma. Mörkin komu á 13 mínútna kafla í fyrri hálfleik. Fylkisliðið virkar frískt og með blússandi sjálfstraust, þeim líður öllum vel inni á vellinum. Félagið á 50 ára afmæli í dag og fékk verðskuldaða afmælisgjöf.

Stóra stundin í dag var þriðja mark Fylkis á 44. mínútu. Emil Ásmundsson fékk boltann frá Oddi Inga fyrir utan teig og lét vaða með viðstöðulausu skoti. Geggjað mark og eins og menn segja oft er þriðja markið mikilvægasta markið í leiknum því þarna varð ljóst að HK ætti ekki endurkomu auðið.

Fylkir tekur toppsætið að nýju með þessum sigri og sýna að þeir ætla að standast þær væntingar sem gerðar eru til þeirra að fara beint upp í Pepsi-deildina í haust. HK þarf ekkert að skammast sín, staðan í deildinni er fín og þeir hefðu getað komist á toppinn í dag með 2-0 sigri. En þetta er langt mót og rétt byrjað. Teljum stigin frekar þegar líður á.

Þetta var enginn draumadagur hjá Andra Þór Grétarssyni markverði HK. Þurfti að horfa á eftir boltanum í mörkunum glæsilegu hjá Emil en lét líka Albert Brynjar fífla sig í öðru markinu. Munaði líka engu að hann gæfi mark þegar hann fór út fyrir teiginn og skildi markið eftir tómt.

Elías Ingi átti góðan dag. Hann tæklaði þau mál sem þurfti að gera með því að ýmist ræða við menn eða beita sínu tóli, gulu spjöldunum. Jóhannes Karl þjálfari HK kvartaði yfir tæklingu Ásgeirs Eyþórssonar í öðru markinu, mér fannst tæklingin frábær, honum fannst þetta gróft brot, tveggja fóta tækling. Elías dæmdi ekkert og ég skil það vel við fyrstu sýn.