FH nýtti sín færi á meðan Grindavík gerði það ekki. Þetta voru tvö svipað góð lið að mætast í mikilvægum leik en munurinn á liðunum liggur í færanýtingunni. Heilt yfir fengu bæði lið ca fjögur góð marktækifæri í leiknum. FH skoraði þrjú mörk en Grindavík aðeins eitt.

Mark Guðnýjar. Bentína sendi boltann aftur á Emmu markvörð en Emma var lengi að kveikja og en náði að bjarga í hornspyrnu áður en boltinn fór í hennar eigið net. Guðný tók hornspyrnuna og spyrnti boltanum bara beint inn í markið. Virkilega góð spyrna hjá henni en Emma átti að gera betur.

FH nær að spyrna sér frá liðunum í fallbaráttunni með sigrinum. FH er nú með helmingi fleiri stig en Grindavík sem er í 7. sæti. Fyrir tímabilið bjuggust margir við fimm hesta hlaupi í botnbaráttunni en FH ætlar sér ekkert að vera í þeim slag. Þeim líður vel um miðja deild

Emma Higgins markvörður Grindvíkinga átti ekki góðan leik í kvöld. Átti að gera betur í öðru marki FH þegar Guðný skoraði beint úr hornspyrnu. Þá átti hún nokkrar lélegar spyrnur í leiknum og heilt yfir var þetta ekki góður leikur hjá henni. Hinn markvörður liðsins, Malin Reuterwall var ekki í hópnum í dag þar sem hún fékk heilahristing á dögunum. Emma er einfaldlega ekki nægilega góð til þess að standa í markinu hjá Grindavík.

Ekkert út á Gylfa að setja. Leyfði leiknum að fljóta vel. Komu auðvitað atvik þar sem hann hefði getað dæmt öðruvísi, líkt og gengur og gerist. En heilt yfir fínasti leikur hjá honum