Varnarleikur Vals var frábær í dag og tókst þeim að loka á flest öll svæði þegar KA sótti. Fyrri hálfleikurinn var örlítið kaflaskiptur og KA hefði hæglega getað jafnað metin eftir darraðadans í teignum en tókst ekki. KA spilaði í raun betur þegar liðið var ellefu gegn ellefu, heldur en þegar Valur var manni færri. Ákafinn að ná inn jöfnunarmarki var kannski aðeins of mikill og þess vegna fékk liðið ekki meira út úr leiknum í dag. Færanýting Vals var þó afar slök og hefði það getað kostað liðið stig í dag.

Ólafur Jóhannesson, þjálfari Vals, fékk boltann við hliðarlínuna þegar KA átti innkast. Gestirnir voru að flýta sér að taka það en Óli kastaði boltanum yfir KA-manninn. Hann fékk áminningu fyrir það og baðst afsökunar en hann sagðist hafa misst boltann úr höndunum og honum til varnar þá leit það nefninlega þannig út.

Valur er áfram í efsta sætinu. Þetta veit einnig á gott fyrir varnarleik liðsins. Eiður Aron kom inn og spilaði frábærlega þrátt fyrir að hafa ekki spilað fótboltaleik síðan í febrúar. Rasmus kom inn af krafti í taktískri skiptingu og Orri Sigurður var einnig góður. Það var því eðlilegt að Óli Jó hafi verið kátur eftir leik því það gekk flest allt upp hjá hans liði.

Emil Lyng fékk nokkur góð færi en nýtti þau illa. Ekki sá sami Emil og maður hefur séð í síðustu leikjum. Kristinn Ingi Halldórsson og Sigurður Egill Lárusson hafa oft verið betri, nýttu færin sín illa. Börðust mikið samt sem áður.

Þetta var hart í hart leikur. Nokkrar ákvarðanir hjá dómaratríóinu sem var erfitt að botna í. Heilt yfir slakur dagur.