Leikurinn var ótrúlega opinn í báða enda og í raun rannsóknarefni hvernig mörkin urðu ekki fleiri. Færanýtingin var gríðarlega döpur. KR átti ekki skilið að fara tómhent úr leiknum og náði á dramatískan hátt að kreista fram jöfnunarmark í lokin.

Uppbótartími. Guðmundur Andri Tryggvason geysist í teignum, fer niður og brot dæmt á Gunnleif Gunnleifsson. Ansi vafasamur dómur og í raun líklega rangur. Klókindi hjá Guðmundi Andra þó maður vilji ekki hrósa mönnum fyrir að fara niður...

KR hefði verið í fallsæti með tapi en bjargaði sér fyrir horn. Tímabilið risastór vonbrigði fyrir KR-inga hingað til. Aftur missa Blikar stig frá sér í uppbótartíma og eru hundfúlir með það. Breiðablik er í sjöunda sæti en KR í níunda. Stigasöfnun beggja liða ekki samkvæmt væntingum.

Tobias Thomsen fór illa með mörg mjög góð færi. Hann er fenginn til liðsins til að nýta svona færi og var ekki að vinna vinnuna sína. Kennie Chopart heldur áfram að valda vonbrigðum þetta sumarið og Finnur Orri Margeirsson getur miklu betur svo einhverjir séu nefndir.

Ekki merkilegur leikur hjá Þóroddi. Lítil atriði sem hægt er að setja stór spurningamerki við og svo eitt risastórt atriði í lokin þegar vítaspyrnan var dæmd.