Gæði Breiðabliks eru einfaldlega meiri en hjá Grindavík. Brekkan var brött hjá Grindavík fyrir leik, og varð hún enn brattari eftir fyrsta markið. Annað mark Breiðabliks var það síðasta sem Grindavík þurfti á að halda. Grindavík átti þó fína kafla í leiknum og hefði auðveldleg getað skorað í leiknum.

Klúður Grindavíkur. Í stöðunni 1-0 gerði Ingibjörg Sigurðardóttir fátíð mistök í vörninni og missti boltann við sinn eigin vítateig. Rilany Da Silva náði boltanum af henni en skaut í stöng, ein á móti markmanni. Hefði boltinn farið inn hefðum við haft allt annan leik í höndunum. En í stað þess að jafna leikinn, skoraði Breiðablik skömmu síðar tvö mörk og staðan skyndilega orðin 3-0.

Breiðablik heldur eltingaleiknum áfram við Þór/KA en Akureyrarliðið hefur sex stiga forskot. Blikakonur eru hins vegar ekki búnar að gefast upp. Grindavík getur þakkað fyrir það að liðin í kringum þær í deildinni töpuðu öll. Framundan eru algjörir úrslitaleikir en næstu þrír leikir eru allir við liðin í kringum liðið í deildinni. Vinnist þeir, geta þær nánast bókað farseðilinn í Pepsi-deild kvenna að ári. Tapist leikirnir hins vegar er staðan orðin svört.

Vinstri bakvarðarstaða Grindavíkur. Þrír leikmenn léku þessa stöðu í leiknum í dag. Fyrst var það Helga Guðrún sem braut af sér í vítaspyrnunni undir lok fyrri hálfleik. Þegar hún var tekin útaf fór Rilany í bakvörðinn. Skömmu síðar þurfti hún að fara útaf vegna meiðsla. Þá fór Berglind Ósk í vinstri bakvörðinn og átti hún í miklum erfiðleikum með Svövu Rós, sem lék t.d. illa á hana í fjórða markinu.

Heilt yfir virkilega flottur leikur hjá Bríeti og dómarateyminu. Hefði verið afar auðvelt að missa leikinn út í einhverja vitleysu en Bríet hafði fullkomnlega stjórn á leiknum.