Anisa var einstaklega klók í kvöld, hún var dugleg að finna sér auð svæði, sótti boltann niður og átti flott hlaup sem sköpuðu mikla hættu við mark KR. Hún skoraði einnig tvö mörk og hefði hæglega getað sett fleiri ef Ingibjörg í marki KR hefði ekki varið vel frá henni oftar en einu sinni.

Thelma Björk kom feikilega sterk inn í þessum fyrsta byrjunarliðsleik sínum á tímabilinu. Hún var örugg með boltann og sýndi flotta takta á vinstri kantinum. Hún átti ekki í vandræðum með að komast framhjá Hörpu og átti frábærar fyrirgjafir, þar á meðal eina stoðsendingu. Eins var samspil hennar við fremstu sóknar- og miðjumenn á köflum alveg hreint frábært, einnar snertingar þríhyrningar og flott hlaup.