Leikurinn var virkilega fjörugur og bæði lið sýndu flotta takta. Það virtist þó sem lið Stjörnunnar hafi átt meiri orku á tanknum til að klára leikinn þegar gestirnir fóru að gefa eftir síðasta hálftímann eða svo.

Strax á 4. mínútu leiksins kom upp atvik þar sem Sandra Stephany, leikmaður Þórs/KA, virtist hrinda Kim Dolstra, leikmanni Stjörnunnar, frá sér eftir samskipti þeirra. Bríet lét duga að dæma aukaspyrnu á Stjörnuna eftir brot Kim og hafði þetta engar afleiðingar í för með sér fyrir Söndru. Það er spurning hvort að Bríet hefði betur lyft spjaldi hér, sem hefði heldur betur getað haft áhrif á leikinn. En þess utan þá verður líka að nefna sigurmarkið, fyrsta mark Hörpu á tímabilinu, sem kom á hárréttu augnabliki.

Það er einfalt. Stjarnan fer í undanúrslitin þar sem þær geta mætt Val, ÍBV eða Grindavík. Þór/KA detta út. Sárabótin þeirra er þó að þær geta einbeitt sér að deildinni þar sem þær eru í vænlegri stöðu.

Lið Þórs/KA hefur einungis fengið á sig 3 mörk í öllum 9 leikjum sínum í fyrri umferð Pepsideildarinnar. Þær fá svo á sig 3 mörk hér í kvöld, í einum leik. Það hlýtur að vera ákveðinn skellur þannig að þetta skrifast á varnarleik Þórs/KA í kvöld. Það verður þó að taka fram að Bryndís Lára í markinu kom algjörlega í veg fyrir að Stjarnan næði að skora fleiri mörk með mörgum virkilega frábærum vörslum.

Ég set spurningamerki við ákvarðanatökuna í atvikinu á 4. mínútu en fyrir utan það hafði Bríet nokkuð fín tök á þessum leik. Mikil harka var í leiknum en hún leyfði leiknum samt að fljóta nokkuð vel án þess að missa tök á honum, sem hefði allt eins getað gerst í svona fast spiluðum leik.