Tvö glæsileg skot hjá Einari Karli Ingvarssyni skildu liðin að. Einar Karl er með eitraðan vinstri fót og hann sýndi það svo sannarlega í kvöld. Mörkin í leiknum höfðu auðveldlega getað orðið fleiri og heilt yfir voru það heimamenn sem áttu fleiri færi. Grindvíkingar áttu þó sína spretti og Andri Rúnar fékk dauðafæri til að koma þeim yfir snemma leiks. Grindvíkingar settu einnig fína pressu á Val í síðari hálfleik en án árangurs.

Síðara markið hjá Einari Karli var alvöru negla fyrir utan vítateig og það kláraði leikinn fyrir Val. Valsmenn höfðu þá skipt úr þriggja manna vörn yfir í fjögurra manna og tekið Patrick Pedersen af velli til að þétta raðirnar. Mark Einars gekk síðan frá sigrinum.

Valsmenn eru áfram með fimm stiga forskot á Stjörnuna á toppi deildarinnar. Grindavík er hins vegar áfram í 4. sæti með 24 stig en þetta var fjórða tap liðsins í fimm leikjum í seinni umferðinni.

Milos Zeravica, miðjumaður Grindvíkinga, er bestur þegar hann er með boltann og fær að stjórna spilinu. Grindvíkingar héldu boltanum illa í fyrri hálfleik og Milos var tekinn af velli í leikhléi eftir að hafa verið lítið í boltanum. Gunnar Þorsteinsson var einnig í basli þegar hann lenti í kapphlaupi í vörninni. Hann er betri þegar hann spilar á miðjunni.

Gunnar Jarl hafði fín tök á þessu. Beitti hagnaðarreglunni vel í fyrri hálfleik og spjaldaði tvo menn á sama augnablikinu síðan. Í síðari hálfleik stoppaði Gunnar leikinn þar sem hann var meiddur á læri. Jarlinn kláraði síðan leikinn með sæmd.