Sóknargæði fyrst og fremst. Stjarnan kláraði sínar fyrstu tvær sóknir með marki og þegar fór að hægjast um í pressu gestanna komu þeir miskunnarlaust á þá.

Mark númer tvö klárar þennan leik. Ólafur Karl við endalínu á ekki að fá að skora en einhvern veginn lak skot hans inn á nærstöngina. Eftir það var lítil von fyrir gestina.

Stjarnan heldur pressu á Valsmönnum á toppnum og styrkja tök sín á silfursætinu a.m.k. Fjölnismenn sökkva dýpra niður í fallslaginn einfaldlega og mikil barátta þar framundan.

Varnarleikur Fjölnis var slæmur í dag. Eftir flott sumar hjá Þórði á hann mark Stjörnunnar númer 2 og svo verður ekki horft framhjá því að Siers var í stöðugum vandræðum. Þeir tveir áttu erfiðast.

Solid frammistaða. Þorvaldur handviss um vítaspyrnuna og hélt sömu línu allan leikinn. Menn misánægðir með ákvarðanatöku eins og gengur, en línan sú sama báðu megin. Flott frammistaða.