Ætli það hafi ekki verið sigurhefðin sem skilaði Valskonum þessum sigri? Það hefur lítið fallið með Fylki í sumar og það var engin undantekning á því í kvöld. Leikurinn byrjaði fjörlega þegar Vesna skoraði beint úr horni. Síðan var lítið að frétta þar til Brooke Hendrix jafnaði rétt fyrir hlé eftir hornspyrnu. Seinni hálfleikur var einnig tíðindalítill lengst af en boðið var uppá markasúpu á lokamínútunum. Fyrst skoraði Ariana Calderon en Kaitlyn Johnson náði að svara fyrir Fylki. Allt virtist stefna í jafntefli þegar Valskonur fengu dæmda vítaspyrnu í uppbótartíma. Vesna fór á punktinn og kláraði þetta fyrir Valskonur. Mikilvægur sigur hjá Valsliðinu sem oft hefur spilað betur.

Sigurmark Vals. Fylkiskonur voru búnar að eyða mikilli orku í að sækja jöfnunarmarkið og það var glæsilegt. Fá svo dæmt á sig víti í uppbótartíma. Vesna skorar og heimakonur taka stigin þrjú.

Valskonur hafa nú unnið þrjá í röð í deildinni á meðan hin liðin í baráttunni um 2. sætið hafa tapað stigum. Með sigrinum fara þær upp fyrir Stjörnuna og ÍBV og í 3. sæti deildarinnar. Falldraugurinn svífur hinsvegar enn yfir Árbænum. Fylkiskonur eru í 9. sæti með 5 stig og útlitið ekki gott.

Tinna Bjarndís var flott í varnarlínu Fylkis í dag en fær dæmt á sig víti í uppbótartíma. Hrikalega svekkjandi fyrir fyrirliða Fylkis sem fer væntanlega svekkt á koddann. Vont að enda daginn á þessu.

Birkir var ekki með nógu góð tök á leiknum og ekki alveg samkvæmur sjálfum sér.