Blikar voru hreinlega alltof stór biti fyrir Hauka í kvöld. Þær byrjuðu leikinn af þvílíkum krafti að það hefði í raun ekki komið á óvart þó að staðan hefði verið 4-0 eftir fyrstu 10 mínúturnar! Haukar náðu þó að minnka muninn í upphafi seinni hálfleiks en þá skiptu Blikar bara um gír. Haukar voru í tómu tjóni varnarlega og Blikar gengu upp á lagið.

Í aðdraganda 6. marks Blika kom upp atvik þar sem Selma Sól og Sæunn áttust við. Sæunn var alveg í bakinu á Selmu Sól sem var með boltann. Ég gat svo ekki betur séð en að Selma Sól hafi sett olnbogann all hressilega í höfuðið á Sæunni. Fyrir mér er það ekki eðlileg hreyfing, né nauðsynleg, til að skýla bolta þar sem olnboginn fór hátt. En Arnar dómari sá ekki ástæðu til að stöðva leikinn þó að Sæunn lægi óvíg eftir vegna höfuðmeiðsla, né að spjalda Selmu Sól, og Blikar héldu áfram sókninni og skoruðu mark. Ég held að Selma Sól hafi verið mjög heppin að sleppa með þetta.

Blikar eru nú í 2. sæti deildarinnar með 30 stig og eru því efstar af þessum 4 liðum sem berjast um 2. sæti deildarinnar. Það er þó stutt á milli liðanna og líklegt að ein mistök geti kostað þær þetta 2. sæti. En með sóknarleik eins og í dag þá eru þeim flestir vegir færir. Ef þær ná svo að þétta vörnina líka þá eru þær bara í góðum málum. Haukar eru aftur á móti í virkilega vondum málum og allt stefnir í fall úr deildinni. Liðið hefur fengið á sig langflest mörk allra liða í deildinni og erfitt að sjá þær stoppa í þessi göt og snúa við taflinu í næstu umferðum því miður.

Varnarleikur Hauka var í molum í dag! Þjálfararnir reyndu nýja uppstillingu til að koma í veg fyrir að illa færi og ákváðu að setja markahæsta leikmanninn sinn, Marjani Hing-Glover, í hafsentastöðu í 3 hafsenta vörn. Marjani var upprunalega ætlað að stoppa Svövu Rós en Svava hreinlega pakkaði henni saman og lét hana líta illa út. Þetta var áhætta sem þjálfarar Hauka tóku en hún skilaði ekki tilætluðum árangri í dag.

Þetta var ekki harður leikur. Hann leyfði leiknum að fljóta ágætlega og þurfti ekki að dæma mikið. En ég held að hann hefði átt að aðhafast eitthvað í atvikinu sem ég nefni hér til hliðar.