Mist Rúnarsdóttir @MistRunarsdotti

Textalýsing Skýrslan Viðtöl

Hvað réði úrslitum? Breiðablik var mun betra liðið í dag. ÍBV saknaði Rutar Kristjáns og Cloé Lacasse sárlega og voru aldrei líklegar þrátt fyrir ágætan fyrri hálfleik. Blikar hertu tök sín á leiknum í síðari hálfleik og þegar þeim tókst að opna ÍBV-vörnina gerði Eyjapæjan Berglind Björg vel í að nýta færin sín. Bestu leikmenn 1. Berglind Björg Þorvaldsdóttir Nýtti færin sín og skoraði öll þrjú mörk leiksins. Hennar önnur þrenna í sumar. Er komin með 13 mörk í deildinni. 2. Rakel Hönnudóttir Fyrirliði Blika hefur verið í hörkuformi eftir EM-hlé og átti enn einn toppleikinn í dag. Gríðarlega sterk bæði fram á við og til baka. Atvikið Berglind Björg fullkomnaði þrennuna á 84. mínútu. Kláraði færin sín af mikilli yfirvegun og skoraði sína aðra þrennu í sumar. Þá verður einnig að minnast á gula spjaldið hennar Sóleyjar. Fyrirliði ÍBV hefur leikið 167 meistaraflokksleiki fyrir ÍBV á síðustu 10 árum en fékk sitt fyrsta gula spjald á meistaraflokksferlinum þegar hún togaði Svövu Rós niður í kvöld! Það er gjörsamlega sturluð staðreynd.

Hvað þýða úrslitin? Blikar eru í góðri stöðu til að landa 2. sætinu og fresta fagnarðarlátum Þórs/KA um stund. ÍBV er áfram í 4. sæti. Vondur dagur ÍBV-liðið átti í basli í dag og tókst ekki að fylla í skörðin sem Cloé og Rut skildu eftir. Það er ótrúlegt hvað fámennur leikmannahópurinn hefur náð góðum árangri í sumar en það var of stór biti að missa út tvo lykilmenn í svona erfiðum leik. Dómarinn - 7,5 Dómaratríóið stóð sig vel en leikurinn svo sem ekki sá erfiðasti til að dæma. Engin vafaatriði og lítið um brot.