Magnús Þór Jónsson @maggimark

Textalýsing Skýrslan Viðtöl

Hvað réði úrslitum? Einbeitingarleysi í varnarleik Blika og markanef Kristins Inga Halldórssonar. Það var ljóst að það yrði djúpt á marki í þessum leik, Kristinn var langfyrstur á lausan bolta eftir flotta vörslu Gunnleifs við skot frá Einari Karli. Bestu leikmenn 1. Eiður Aron Sigurbjörnsson Akkerið í varnarleiknum í fyrri hálfleik Valsmanna og ró í uppspilinu allt annað eftir að hann kom til leiks við þá rauðu. Vörnin var þriggja manna í kvöld í fjarveru Bjarna Ólafs og Eiður stýrði henni. 2. Gísli Eyjólfsson Potturinn og pannan í öllu sem Blikar gerðu sóknarlega, fín skot líka. Gísli búinn að eiga mjög gott sumar í brokkgengu Kópavogsliði. Atvikið Haukur Páll tók fullorðins tæklingu á Svein Aron á miðjum vellinum eftir rúmlega 20 mínútna leik, kom ansi duglega að því er virtist með báðum fótum. Þóroddur mat að hann hefði tekið boltanna og dæmdi ekki aukaspyrnu en Blikastúkan heimtaði rautt spjald. Þarf endursýningu til að sjá.

Hvað þýða úrslitin? Valsmenn eru allt að því búnir að tryggja sér titilinn. Geta gert það strax í næstu umferð ef þeir ná betri árangri en Stjörnumenn, gætu klárlega fagnað gífurlega á Akureyrarvelli á fimmtudag. Blikar geta kvatt Evrópudrauminn og þurfa sigur til að hrista endanlega af sér falldrauginn. Vondur dagur Rispuð plata þegar Blikaliðið á í hlut. Þetta lið er mjög gott fótboltalið þangað til það kemst inn á sóknarþriðjunginn, þá eru rangar ákvarðanir teknar og eilítið einbeitingarleysi virkar á mann í teignum. Vænlegar sóknir koma þeim í flottar stöður sem þeir nýta illa. Í dag féllu sénsarnir fyrir Andra og Arnþór helst og því sofa þeir örugglega verst, en Sveinn Aron og Martin Lund eiga líka að gera miklu betur. Milos augljóslega pirraður á sóknarnýtingunni sinni í sumar. Dómarinn - 8,0 Leikurinn rann ágætlega hjá tríóinu og margar flottar ákvarðanir, sérstaklega gaman að sjá menn dæma á brot þó að sóknaraðilinn fljúgi ekki um loftin og Þóroddur beitti flottum hagnaði. Atvikið tekur hann aðeins niður, mér fannst hann eiga að dæma þar, en ef það var rétt mat hjá flautaranum fær hann alveg heilum hærra í einkunn.