Bjarni Þórarinn Hallfreðsson @BjarniThorarinn

Textalýsing Skýrslan Viðtöl

Hvað réði úrslitum? Í raun var það vindurinn sem sem réði úrslitum í leiknum. Stífur vindur var á annað markið og var einstefna á það allan leikinn. Bæði lið náðu að lauma inn einu marki á móti vindi og fór svo að þrjú mörk Grindavíkur með vindinn í bakið í fyrri hálfleik reyndist nóg til þess að ná í stigin þrjú. Bestu leikmenn 1. Andri Rúnar Bjarnason Hvað er hægt að segja meira um þennan framherja? Margir voru farnir að efast um að hann gæti náð þessu blessaða markameti og þá hendir hann í tvö mörk. Andri er aðeins einu marki frá markametinu eftir tvö virkilega góð mörk í dag. Hann er alltaf hættulegur og virðast sumir varnarmenn einfaldlega vera orðnir hræddir við hann. Stoppar aldrei og er alltaf mættur í aftasta varnarmann. Alvöru framherji. 2. Marinó Axel Helgason Voru tveir sem komu til greina þarna. Alexander Veigar og Marinó Axel. Sá síðarnefndi fær þessi verðlaun í þetta skiptið. Alexander var mjög öflugur í leiknum og var mikil hætta þegar hann var með boltann í löppunum. Marinó hins vegar skilaði virkilega góðu dagsverki í dag. Var góður varnarlega, sem og sóknarlega. Átti nokkrar mjög góðar fyrirgjafir og ein þeirra endaði á kollinum á Andra Rúnari sem þýðir oftast mark. Atvikið Óbeina aukaspyrnan. Þetta var allt saman furðulegt atvik. Sending kemur til baka á Gunnleif og tekur hann boltann með höndunum en Grindvíkingar settu pressu á hann. Allir geta gert mistök og gerði Gunnleifur það í þessu atviki. Hann fattaði mistök sín þegar boltinn hafði snert hendurnar á honum og var hann fljótur að reyna að fela það. Egill dæmdi hins vegar réttilega óbeina aukaspyrnu. ALLIR vissu hver átti að taka spyrnuna. Andri Rúnar gat fullkomnað þrennuna, og komist í 19-marka klúbbinn og var hann heldur betur nálægt því! Þrumuskot hans endaði í slánni.

Hvað þýða úrslitin? Fyrir umferðina var Grindavík ekki líklegt til þess að falla úr deildinni, þrátt fyrir að tölfræðilegur möguleiki væri á því en með sigrinum í dag er staðan orðin enn betri. Breiðablik hins vegar er ekkert í spennandi stöðu. Liðið er fjórum stigum á undan Víking Ó. sem á leik til góða. Fjölnir á einnig leik til góða. Breiðablik er í ágætri stöðu miðað við önnur lið í fallbaráttunni en þeir eru samt ekki hólpnir. Vondur dagur Aron Bjarnason skoraði fyrsta mark leiksins. Fyrir utan það sást hann hins vegar ekkert í leiknum. Þá var miðja Breiðabliks afar flöt, sem er ekki gott á móti sterkri miðju Grindvíkinga. Sýnir sig í því að Andri Rafn og Arnþór Ari voru báðir teknir af velli en þeir áttu ekki góðan leik í dag. Dómarinn - 7 Egill átti flottan leik í dag. Var frábær í fyrri hálfleik en dalaði hins vegar örlítið í seinni hálfleik. Var fljótur á veifa gulu spjöldunum en stóru atvikin í leiknum voru að ég tel hárrétt hjá honum. Þetta var fyrsti leikur Egils í Pepsi-deildinni og getur hann labbað sáttur frá borði